İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 820 Hüküm no: 999 Orijinal metin no: [138a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadızâde Abdurrahim Efendi’nin Mehmed Çelebi b. Yahya’ya beş yüz esedî guruş borcu olduğunu ikrar ettiği Husûs-ı âti’z-zikri mahâllinde tahrîr için cânib-i şer‘den bi’l-iltimâs irsâl olunan Abdülkadir Efendi sâbıkā Edirne kādısı olan a‘lemü’l-ulemâ’i’l-izâm efdalü’l-fudalâi’l-fihâm yenbû‘u’l-fezâil metbû‘i’l-efâzil Kādızâde Mehmed Efendi’nin mahmiye-i İstanbul’da Harâcî Kara Mehmed mahallesinde vâki‘ menzil-i âlîlerine varıp zeyl-i rakīmde mastûrü’l-esâmî Müslimîn huzûrunda akd-i meclis-i şer‘-i şerîf [etdikde] müşârün-ileyh Mehmed Efendi’nin birâderi zahru kuzâtü’l-İslâm Abdurrahim Efendi meclis-i ma‘kūd-ı mezkûrda işbu kitâbın sahibi Mehmed Çelebi b. Yahya mahzarında ikrâr-ı tâm ve takrîr-i kelâm edip semenleri târih bir sene tamamına değin mü’eccel ve mev‘ûd olmak üzere mezbûr Mehmed Çelebi yedinden iştirâ ve kabz eylediğim iki re’s beyaz bargir ve kırmızı keçe pûşîde bir koçı bahâsından yüz esedî guruş ve bir re’s doru at bahâsından dahi yüz esedî guruş ve yine sene-i mezbûre tamamına değin mü’eccel ve mev‘ûd mezbûr Mehmed Çelebi yedinden makbûzum olan üç yüz esedî guruş ki min-haysü’l-mecmû‘ mezbûr Mehmed Çelebi’ye beş yüz kıt‘a esedî guruş vâcibü’l-edâ ve lâzımü’l-kazâ deynim vardır deyü bi-tav‘ihiikrâr eyledikden sonra gıbbe’t-tasdîkı’ş-şer‘î ile kefîl olmağın mevlânâ-yı mezbûr vâki‘ hâlini mahâllinde tahrîr ba‘dehû ma‘an ba‘s olunan Mustafa b. Ali ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Bayram Efendi b. Şeyh Receb el-kādî, Mustafa Çelebi b. Ahmed, Hüseyin Efendi b. Hasan Efendi, Yahya Efendi b. Ahmed, el-Hâc Cüneyd b. Abdullah, el-Hâc Siyavuş b. Abdullah.