İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 821 Hüküm no: 1000 Orijinal metin no: [138a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Şaban Efendi mehir ve nafaka hususunda boşandığı kocası İbrahim Çelebi’nin zimmetini ibra ettiği Husûs-ı âti’l-beyânın mahâllinde ketb ve tahrîri iltimâs olunmağın cânib-i şer‘den Mevlânâ Ahmed Efendi irsâl olunup ol dahi mahmiye-i İstanbul’da Hasan Halîfe mahallesinde İbrahim Çelebi b. Bahşi nâm kimesnenin sâkin olduğu menziline varıp zeyl-i vesîkada isimleri mastûr olan Müslimîn huzûrunda akd-i meclis-i şer‘ eyledikde zâtı Şaban Efendi b. Osman ve Mehmed Bey b. Receb tarifleri ile mu‘arrefe olan Sâliha bt. Şaban Efendi nâm hatun meclis-i mezbûrda zevc-i mutallıkı rafi‘u’l-kitâb mezbûr İbrahim Çelebi mahzarında ikrâr ve takrîr-i kelâm edip mezbûr İbrahim Çelebi zevcim olup beni talâk-ı bâyin ile tatlîk eylediğinde zimmetinde mütekarrir ve ma‘kūdün-aleyh olan üç bin iki yüz akçe mehr-i mü’eccelim ve nafaka-i iddet-i ma‘lûmem ve me’ûnet-i süknâm için ta‘yîn olunan yedi yüz yirmi akçe ki cem‘an üç bin dokuz yüz yirmi akçe hakkımı mezbûr İbrahim Çelebi yedinden bi’t-tamam ve’l-kemâl ahz u kabz eyledim ba‘de’l-yevm zevciyete müte‘allik cemî‘ da‘vâdan mezbûr İbrahim Çelebi’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mevlânâ-yı mezbûr mahâllinde ketb ve tahrîr edip ba‘dehû ma‘an ba‘s olunan Osman b. Abdurrahman ile meclis-i şer‘a gelip alâ-vukū‘ihî inhâ ve ihbâr etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Abdi Ağa b. Ahmed, Mustafa b. Nesîmî, Ali Çelebi b. Ahmed, Hasan b. Hüseyin, Ebûbekir Beşe b. Mehmed, İbrahim Beşe b. Abdullah, Mustafa b. Mehmed.