İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 830 Hüküm no: 1013 Orijinal metin no: [140b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Bey b. Abdülmennan’ın vakfettiği harap menzilin Fazlı Efendi b. Musa tarafından mülkü olmak üzere tamir ve inşasına izin verildiği Mehbıtü’l-envâr makarru’l-ebrâr belde-i mübâreke-i Hâlidiyye medîne-i Hazret-i Ebî Eyyûbi’l-Ensârî -subbet alâ-merkadihî sicâlü rahmeti Rabbihî- hâlâ seccâde-nişîn-i şer‘-i Muhammedî olan a‘lemü’l-ulemâ’i’l-izâm efdalü’l-fudalâi’l-fihâm yenbû‘u’l-fezâil menbû‘ü’l-efâzil nâsibu râyâti’l-gayûrât vâsılu gāyâti’l-ma‘ârif sahibü’l-kitâbi’l-müstetâb Fazlı Efendi b. Musa meclis-i şer‘-i şerîf-i şâmihü’l-imâdda takrîr-i kelâm ve ta‘bîr ani’l-merâm edip mahmiye-i İstanbul’da Şehremîni semtinde Yavaşca Mehmed Ağa zâviyesi kurbünde Kâtib Mustafa Çelebi mahallesinde vâki‘ lede’l-ahâlî ve’l-cîrân ma‘lûmetü’l-hudûd menzili bundan [akdem] Süleyman Bey b. Abdülmennan nâm sahibü’l-hayr vakf-ı sahîh ve lâzım ile vakf ve habs ve süknâsını evvelen kendi nefsine ba‘dehû evlâdına ve evlâd-ı evlâdına ba‘de’l-inkırâz utekā ve atîkatına ba‘dehûm ulemânın mütezevvicînden bir recül-i sâliha şart ve ta‘yîn etmeğin menzil-i mezbûrda şart-ı vâkıf üzere ba‘demâ sâkin olan Âişe nâm hatun fevt olmağla süknâ-yı menzil-i mezbûr mahlûl olmağın cânib-i şer‘den Aşkī Hüseyin Efendi nâm müderrise tevcîh olunup ol dahi menzil-i mezbûrda sâkin iken fevt olmağla kıbel-i şerî‘at-ı mutahharadan bana tevcîh olunup lâkin menzil-i mezbûr mürûr-ı eyyâm ve kürûr-ı a‘vâm ile harâb ve mâil-i turâb olup kâbil-i süknâ olmamağla menzil-i mezbûrda mâlım ile mülküm olmak üzere nefsim için ihdâs [ve] ibnâya menzil-i mezbûrun kıbel-i şer‘den mansûb mütevellîsi olan Receb Bey’den izin ve yedime mümzâ ve mahtûm temessük almış idim el-hâletü hâzihî cânib-i şer‘-i şerîfden vech-i muharrer üzere izin verilmek matlûbumdur deyü mütevellî-i mezbûrun imzâsıyla mümzâ ve hâtemiyle mahtûm min-külli’l-vücûh takrîrine muvâfık ve icâreteyni hâvî temessük ibrâz etmeğin mûcebince menzil-i mezbûra mâlıyla mülk olmak üzere nefsi için ihdâs ve ibnâya mûmâ-ileyh Fazlı Efendi’ye kıbel-i şer‘den izin verilip mâ hüve’l-vâki‘ [bi’t-taleb ketb olundu.] Fi’l-yevmi’s-sânî ve’l-işrîn min-Zilhicceti’ş-şerîfe [li-sene] isneyn ve seb‘în ve elf. Şuhûdü’l-hâl: Fahrü’l-kuzât Hüseyin Efendi b. Hasan, Fahrü’l-müsta‘îddîn Eyüb Efendi b. Mehmed, Salih b. Mehmed Efendi, Mehmed Beşe b. Fazlı, Mehmed Efendi b. Hasan, Ali Beşe b. Abdullah, Hüseyin Beşe [b.] Tayyib, gayruhum.