İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 830 Hüküm no: 1012 Orijinal metin no: [140a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Bey b. Abdülmennan’ın vakfettiği menzile Receb Bey b. Habib’in mütevelli tayin edildiği Dârü’l-hilâfeti’l-aliyye Kostantıniyyeti’l-mahmiye’de Şehremîni semtinde Yavaşca Mehmed Ağa zâviyesi kurbünde Kâtib Mustafa Çelebi mahallesinde merhûm Süleyman Bey b. Abdülmennan nâm sahibü’l-hayr bundan akdem vakf-ı sahîh ve lâzım ile vakf ve habs edip süknâ ve tevliyeti evvelâ kendi nefsine ba‘dehû evlâdına ve evlâd-ı evlâdına ba‘de’l-inkırâz utekā ve atîkatına ba‘dehûm ulemânın müzevvicînden bir recül-i sâliha şart ve ta‘yîn eylediği lede’l-ahâlî ve’l-cîrân ma‘lûmetü’l-hudûd vakıf menzilin [140b] hâlâ müte‘ayyin mütevellîsi olmağla hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri işbu râfi‘u’l-kitâbi’l-müstetâb fahrü’l-akrân Receb Bey b. Habib nâm kimesneyi hasbî mütevellî nasb ve ta‘yîn buyurmağın ol dahi tevliyet-i mezbûreyi kabûl ve hidemât-ı lâzımesin edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Fahrü’l-müderrisîn Salih Mehmed Efendi, Fahrü’l-eimme Hamza Efendi imâm-ı mahalle-i Cebecibaşı, Ali Beşe b. Emrullah, Hüseyin b. Tayyib, Fahrü’l-müderrisîn Eyüb Çelebi b. Mehmed, Mehmed Çelebi b. Fazlı, Mehmed Efendi b. Hasan.