Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 247 Hüküm no: 273 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Çavuş’un varislerinin Ali Efendi’deki alacaklarını tahsil etmeleri Husûs-ı âti’l-beyânın mahallinde tahrîri iltimâs olunmağın kıbel-i şer‘-i hatîrden irsâl olunan Mevlânâ Keşfî Mustafa Efendi mahmiye-i İstanbul’da Hüsrev Paşa Türbesi kurbünde Hoca Üveys mahallesinde mefharü erbâbü’t-tahrîr ve’l-kalem sâhibü hâze’l-kitâb Ali Efendi b. Hüsnü Ağa’nın sâkin olduğu menzile varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘ eyledikde dergâh-ı âlî yeniçerileri çavuşlarından olup vilâyet-i Rumili’nde Kalonya kazâsına tâbi‘ İsterye nâm karyede sâkin iken bundan akdem vefât eden Ali Çavuş b. Pîrî’nin zevce-i metrûkesi Limo bt. Murtaza’nın zikri âtî husûsa vekîl olduğu şer‘an sâbit olduğundan mâ‘adâ müteveffâ-yı mezbûrun sulbî oğlu Sinan ile sulbiye sagīr kızı Fâtıma’nın tesviye-i emirlerine kıbel-i şer‘den mansûb vasîleri ve ammileri olan Ebubekir b. Pîrî meclis-i ma‘kūd-ı mezbûrda mûmâ-ileyh Ali Efendi mahzarında vesâyeten ve vekâleten ikrâr ve takrîr-i kelâm edip müteveffâ-yı mezbûr Ali Çavuş hâl-i suğrunda mahmiye-i mezbûrede Bezzâzistân-ı atîk’de bezzazistancı Halil Çelebi nâm kimesneye îdâ‘ ve teslîm etdiği iki sarı kese içinde mevcûd beş yüz esedî guruşdan bin esedî guruş ve bir bez kese içinde dahi yedi yüz kırk altı aded şerîfî altını mezbûr Ali Çavuş’un vefâtından sonra verese-i mezbûrûna intikāl etmekle meblağ-ı mezbûru ahz u kabza vesâyetim hasebiyle işbu hâzır bi’l-meclis Mustafa Beşe b. Sinan nâm kimesneyi tarafımdan vekîl nasb u ta‘yîn edip nakl-i şer‘î ile mahmiye-i mezbûreye irsâl etmiş idim, ol dahi ba‘de’l-kabûl mahmiye-i mezbûreye gelip vekâletini mezbûr Bezzâzistânî Halil Çelebi muvâcehesinde mahmiye-i mezbûrede kassâm-ı askerî olan Mehmed Efendi huzûrunda ba‘de’l-isbât meblağ-ı mezbûru bi’l-vekâle ahz u kabz edip lâkin emn-i tarîk olmamağla zikr olunan iki kese içinde mevzû‘ olan beş yüz esedî guruşdan bin esedî guruşu ve bir bez kese içinde mevcûd olan yedi yüz kırk altı şerîfî altını mûmâ-ileyh Ali Efendi’ye îdâ‘ ve teslîm etmiş idi, el-hâletü hâzihi zikr olunan iki kese içinde mevcûd olan bin kıt‘a esedî guruş ile bez kese içinde mevcûd olan yedi yüz kırk altı şerîfî altını bi-a‘yânihâ vesâyetim hasebiyle mûmâ-ileyh Ali Efendi yedinden tamâmen ahz u kabz eyledim dedikde gıbbe’t-tasdîkı’ş-şer‘î müteveffâ-yı mezbûrun zevcesi mezbûre Limo vasiyy-i mezbûr meblağ-ı mezbûru kabza tevkîlini inkâr edip mûmâ-ileyh Ali Efendi’den da‘vâ sadedinde olup mûmâ-ileyh dahi isbâtdan âciz olmağla zevce-i merkūmenin hissesini damân lâzım gelirse meblağ-ı mezbûra tarafeynden emr ü kabûlü hâvî kefâlet-i sahîha-i şer‘iyye ile vasiyy-i mezbûrun li-ümmin er karındaşı Faik nâm kimesne kefîl oldukda vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Receb Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fî 22 min-Recebi’l-ferd li-seneti’l-mezbûr Şuhûdü’l-hâl: Fahrü’l-a‘yân Halil Çavuş b. Sefer 43. Bölük, el-Hâc Bektaş Çelebi b. sefer el-cerrâh, Osman Odabaşı b. Mustafa 10. Bölük, Mehmed Çelebi b. Ömer 77. Cemâ‘at, Ali Beşe b. İsmail bakkāl.