Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 246 Hüküm no: 272 Orijinal metin no: [53a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Saraylı Hatice’nin kızı Fatıma’nın, annesinden intikal eden menzil hissesini eşi Ahmed Paşa’ya hibe etmesi Uhbirtü kemâ fîhi hasbemâ yahvîh harrerehu el-fakīr ileyhi te‘âlâ Husûs-ı âti’z-zikrin mahallinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hasan Efendi b. el-merhûm Hüsameddin Efendi mahmiye-i İstanbul’da Denizabdal mahallesinde vâki‘ menzil-i âti’z-zikre varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Çıkrıkçı Kemâl mahallesinde sâkine iken bundan akdem vefât eden Saraylı Hadîce bt. Abdullah nâm hatunun verâseti zevc-i metrûku Miralem Hüseyin Paşa ile sadriye kebîre kızları Âişe Hanım ve Fâtıma Hanım’a ve usûbet-i sebebiye cihetinden taraf-ı pâdişâhîye münhasıra ve tashîh-i meselesi on iki sehm i‘tibâr olunup sihâm-ı mezbûreden üç sehmi zevci paşa-i [mûmâ]-ileyhe, dört sehmi mezbûre Âişe Hanım’a ve dört sehmi mezbûre Fâtıma Hanım’a ve bir sehmi taraf-ı pâdişâhîye isâbet eylediği sâbit oldukdan sonra zikr olunan Denizabdal mahallesi ahâlîsinden el-Hâc Receb b. Ahmed ve Ahmed Ağa b. Halil ta‘rîfleriyle mu‘arrefe oldukdan sonra merkūme Fâtıma Hanım meclis-i ma‘kūd-ı mezbûrda zevci işbu râfi‘ü’l-kitâbi’l-hâlî ani’l-irtiyâb Doğancıbaşılığı’ndan Rumili Beylerbeyiliği’nden mutekā‘id olan düstûr-ı mükerrem Ahmed Paşa b. Abdurrahman muvâcehesinde ikrâr ve takrîr-i kelâm edip [53b] vâlidem müteveffât-ı mezbûrenin terekesinden olup zikr olunan Denizabdal mahallesinde vâki‘ bir tarafdan Buhûrcu? Hüseyin Beşe mülkü ve bir tarafdan Mustafa mülkü ve bir tarafdan ba‘zan Abdi Beşe veresesi mülkleri ve ba‘zan Bolbacıoğlu Hüseyin mülkü <> ve ba‘zan Ahmed Ağa mülkü ve ba‘zan Mustafa Odabaşı mülkü ve bir tarafdan ba‘zan Hoşlivâ Hatun mülkü ve bir tarafdan ba‘zan tarîk-i âm ile mahdûd muhavvateyni muhtevî, muhavvata-i dâhiliye tabaka-i ulyâda yedi bâb oda ve bir sofa ve bir dîvânhâne ve bir sagīr kasr ve tabaka-i vüstâda üç bâb oda ve bir dîvân hâne ve bir kenîf ve sofa ve süflâda iki bâb oda ve bir matbah-ı kebîr ve bir hamam ma‘a câmekân ve hamam külhânına muttasıl bir bâb oda ve iki su kuyusu ve bahçeyi muhtevî ve muhavvata-i hâriciyesin fevkānî üç bâb oda ve bir kilâr ve üç sofa ve bir kenîf ve bir tahtânî oda ve bir su kuyusu ve bir ahur ve bir sagīr samanhâne ve zât eşcâr-ı müsmire ve gayr-ı müsmire bahçeyi muhtevî menzilden sihâm-ı mezbûreden bana isâbet eden dört sehm hisse-i şâyi‘amı zevcem müşârün-ileyh Ahmed Paşa hazretlerine yedi yüz elli sikke-i haseneye tarafeynden îcâb ve kabûlü hâvî bey‘-i bât ile bey‘ edip ol dahi vech-i muharrer üzere iştirâ ve kabûl edip semeni olan yedi yüz elli sikke-i hasene zevcem paşa-i mûmâ-ileyh hazretlerine hîbetü’d-deyn mimmen aleyhi’d-deyn câize mefhûmunca? hîbe-i sahîha-i şer‘iyye ile hîbe ve temlîk edip ol dahi meclis-i hîbede ittihâb ve temellük ve kabûl eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mustafa Çelebi el-Hâc Ahmed ve el-Hâc Receb nâm kimesne ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî 18 min-Recebi’l-ferd li-sene 1081. Şuhûdü’l-hâl: Fahrü’l-eşbâh Abdi Ağa b. İskender, fahrü’l-akrân Mustafa Ağa b. Ali, Derviş Bey b. Mahmud, Murtaza Bey b. Abdullah, Hasan b. Mehmed.