İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 843 Hüküm no: 1031 Orijinal metin no: [143b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli b. Süleyman’ın tasarrufunda iken yanan vakıf menzilin arsasına Hacı Şaban b. Hüseyin’in müdahale ettirilmemesi Mahmiye-i İstanbul’da Hoca Hayreddin mahallesi ahâlîsinden el-Hâc Şaban b. Hüseyin nâm kimesne meclis-i şerde zikri âtî vakıf odaya vaz‘u’l-yed olduğu şer‘an sâbit olan Veli b. Süleyman mahzarında medîne-i Üsküdar’da medfûn Rum Mehmed Paşa Evkāfı’na ber-vech-i meşrûtiyyet hâlâ mütevellî olan umdetü’l-mevâli’l-kirâm zübdetü’l-e‘âli’l-fihâm sâbıkā Haleb kādısı olan Velizâde Ahmed Efendi tarafından husûs-ı câ’îye vekîl olup Abbas Efendi b. Abdullah ve Hamza Halîfe b. Mustafa nâm kimesneler şehâdetleriyle vekâleti sâbite olan fahrü’l-müderrisîn Süleyman Efendi b. İsmail muvâcehesinde üzerine da‘vâ edip vakf-ı mezbûr müsakkafâtından mahmiye-i mezbûrede Küçükbâzâr kurbünde Hamza Sinan Odaları [demekle] meşhûr odalardan lede’l-ahâlî ma‘lûmü’l-hudûd olup icâre-i mu‘accele ve yevmî bir akçe ücret-i mü’eccele ile mutasarrıf olduğum bir bâb tahtânî oda harîkde muhterik olup arsa-ı sırfa kalup arsa-i merkūme taht-ı icâremde iken mezbûrûn arsa-i merkūmeye bî-vech vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr cevâbında fi’l-vâki‘ zikrolunan oda bundan akdem mezbûr el-Hâc Şaban’ın tasarrufunda iken harîkde muhterik olup arsa-i sırfa kaldıkda mütevellî-i vakf evvelâ müşârün-ileyh Ahmed Efendi icâre-i mu‘accelesine mahsûb olmak üzere vakıf için müceddeden binâ eyle ve illâ âhara îcâr ederim deyü teklîf eyledikde mezbûr el-Hâc Şaban dahi minvâl-i muharrer binâya kudretim yokdur kime dilersen îcâr eyle deyü arsa-i merkūmeden kasr-ı yed eyledikden sonra bana îcâr ve teslîm eyledi deyü def‘le mukabele edecek gıbbe’l-istintâk mezbûr el-Hâc Şaban cevâbında fi’l-vâki‘ bundan akdem mütevellî-i müşârün-ileyh Ahmed Efendi ber-minvâl-i muharrer arsa-i merkūme üzerine vakf için müceddeden üzerine oda binâ edip mâh be-mâh ücret-i mü’eccele-i merkūmesini cânib-i vakfa ver ve illâ âhara îcâr ederim dedikde ben dahi minvâl-i muharrer üzere müceddeden binâ[ya] kudretim yokdur kime dilersen îcâr eyle deyü arsa-i merkūmeden kasr-ı yed etmişdim hâlâ ol arsayı mezbûr Veli’den taleb ederim deyü tav‘an ikrâr edecek ikrâr mûcebince mezbûr el-Hâc Şaban bî-vech mu‘ârazadan men‘ olundu mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-Burûsî kâtibü’l-vesîka, Mahmud Çelebi b. Ali, Mahmud Çelebi b. Mehmed, Ahmed Çelebi b. Mahmud kethudâ-yı muhzırân, Şükrullah b. Mustafa