İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 842 Hüküm no: 1030 Orijinal metin no: [143a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hiyanetinden dolayı Limni Kalesi’ne hapsolunan Darphane Nâzırı Emir Mehmed Paşa’dan alınıp Ali Ağa’ya ihsan olunan evin yerinde keşfolunduğu Dergâh-ı âlî dâme mahfûfen bi’l-avni’d-deyyân subaşılarından olup işbu kitâb-ı sıhhat-nisâbın sahibi umdetü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’l-aliyy ve’l-câhi’l-celî Ali Ağa b. ( ) yediyle buyruldu-i şerîf vârid olup mazmûnu mukaddemâ Darbhâne üzerine nâzır olan Emir Mehmed Paşa’nın hiyâneti ez‘âf-ı muzâ‘af zuhûr etmekle kendisi Limni Kal‘ası’na habs ve paşalık ref‘ olunmağla mahmiye-i İstanbul’da kendi sâkin olduğu evi hatt-ı hümâyûn-ı sa‘âdet-makrûnla müşârün-ileyh Ali Ağa’ya ihsân olunmağla mülknâme-i hümâyûn yazılmak için tarafından nâib gönderip hudûd ve sınırın keşf ve hüccet etdiresiz deyü buyurulmağın imtisâlen li’l-emri’l-âlî savb-ı şer‘-i mutahhardan Mevlânâ Mustafa Efendi b. Ahmed irsâl olunup ol dahi müşârün-ileyh [143b] Ali Ağa ile mahmiye-i mezbûrede Seyyid Ömer mahallesinde vâki‘ mûmâ-ileyh Emir Mehmed Paşa ‘nın kendi sâkin olduğu menzil üzerine varıp zeyl-i kitâbda mastûrü’l-esâmî olan Müslimîn huzûrunda keşf ve mu‘âyene eyledikde menzil-i mezbûrun hudûdu bir tarafdan ba‘zan es-Seyyid Hüseyin Çelebi b. es-Seyyid Mehmed mülküne ve ba‘zan Âzime Hatun mülküne ve bir tarafdan Hüsamzâde Efendi mülküne ve iki tarafdan tarîk-i âmma müntehî olup hâriciyesi altı bâb fevkānî oda ve bir sofa ve dehlizi ve bir câmekânı ve hamamı ve beş bâb tahtânî odayı ve bir ahırı ve karşısında iki bâb tahtânî odayı ve bir su kuyusu ve dört bâb kenîfi ve havluyu ve zât-ı eşcâr-ı müsmire ve gayr-ı müsmire bahçe ve içinde bir bâb bahçevan odasını ve fıskıye ve havuzlu bir köşkü ve bir su kupusunu ve bir dolab kuyusunu hâvî ve dâhiliyesi altı bâb fevkānî odayı ve iki fevkānî sofayı ve dehlizi ve bir hazîne odasını ve bir cihan-nümâyı ve kenîfi ve dört bâb tahtânî odaları ve bir kileri ve bir matbahı ve bir mahzeni ve zât-ı eşcâr-ı müsmire ve gayr-ı müsmire bahçeyi ve içinde bir köşkü müştemil olduğu ba‘de’l-keşf ve’l-mu‘âyene ketb olundu. Fi’l-yevmi’s-sânî ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Mustafa Efendi, Ahmed Efendi b. Nurullah el-imâm, Mustafa Efendi b. Abdurrahman, Halil Efendi b. Nasrullah, Ahmed b. Halil.