İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 845 Hüküm no: 1033 Orijinal metin no: [144a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müderris Mustafa Efendi’nin aldığı borç karşılığında arsasını Mahmud Efendi b. Osman Efendi’ye rehin verip altı aylığına kiraladığı Hüccet-i istiğlâl. Husûs-ı âti’l-beyânın mahâllinde tahrîri iltimâs olunmağın kıbel-i şer‘-i enverden Mevlânâ Mehmed Efendi irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Hacı Ferhad mahallesinde hâlâ kasabbaşı olan umdetü’l-emâcid ve’l-ayân Mahmud Efendi b. Osman Efendi sâkin oldukları menziline varıp zeyl-i rakīmde isimleri mastûr olan Müslimîn huzûrunda akd-i meclis-i şer‘ eyledikde fi’l-asl Anadolu’da kasaba-i İznik sükkânından olup hâlâ müsâfereten mahmiye-i mezbûrede Âşık Paşa mahallesinde sâkin umdetü’l-müderrisîni’l-kirâm Mustafa Efendi tarafından husûs-ı âtîye vekîl olup İbrahim Çelebi b. Süleyman ve Ali Çelebi b. Mustafa Efendi şehâdetleriyle şer‘an vekâleti sâbite olan sulbî oğulları fahrü’l-müderrisîn Hasan Efendi meclis-i ma‘kūd-ı mezbûrda işbu kitâbın sahibi merkūm Mahmud Efendi mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh Mustafa Efendi’nin zikrolunan Âşık Paşa mahalle[sinde] vâki‘ bir tarafı ba‘zan Âsûde Sultan vakfı olan menzile ve ba‘zan Salih Çelebi b. Hasan mülküne ve bir tarafı ba‘zan Hasan Beşe ve ba‘zan Hacı Hamza ve ba‘zan Musa Beşe mülküne ve iki tarafı tarîk-i âmla mahdûd ve zât-ı eşcâr-ı müsmire ve gayr-ı müsmireyi müştemil be-hesâb-ı şatrancî iki bin beş yüz zirâ‘ mülk menzil arsasını cümle tevâbi‘ ve levâhıkı ve kâffe-i hukūk ve merâfıkı ile mezkûr Mahmud Efendi’ye bin esedî guruşa bi-tariki’l-istiğlâl bey‘ ve teslîm ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr bin esedî guruşu merkūm Mahmud Efendi’den tamamen ahz u kabz edip târih-i kitâbdan yüz seksen gün tamamına dek arsa-i mahdûde-i mezbûru ba‘de’t-tahliyeti’ş-şer‘iye merkūm Mahmud Efendi yetmiş beş guruşa bana îcâr ben dahi müvekkil-i mûmâ-ileyh Mustafa Efendi için bi’l-vekâle istîcâr ve kabûl eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Lütfullah Efendi b. es-Seyyid Emrullah, Mehmed Efendi b. Pir Mehmed, Şaban Efendi b. Hasan, Ali Çelebi b. Mustafa, Ömer Ağa el-muhâmî, Mustafa Efendi b. Receb, Mehmed b. Mustafa, Mustafa el-müezzin, Bektaş Çelebi b. Hasan, Mustafa Çelebi b. Hamza Efendi ve gayruhum.