İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 846 Hüküm no: 1034 Orijinal metin no: [144a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Mustafa’nın, küçük yaşta ölen Mehmed b. Ömer Ağa’nın amcası ve varisi olduğunu ispat ettiği İsbât-ı verâset. Vilâyet-i Rumeli’nde İşim kazâsına tâbi‘ Malkoç nâm karye sükkânından Hüseyin Beşe b. Mustafa meclis-i şerde mahmiye-i İstanbul’da Mimar Sinan mahallesinde sagīren fevt olan Mehmed b. Ömer Ağa’nın cedde-i sahîhası olup müteveffâ-yı mezbûrun li-ebeveyn kız karındaşı Âişe nâm sagīrenin kıbel-i şer‘den mansûbe vasîsi olan Âmine bt. İbrahim mahzarında üzerine da‘vâ edip ben müteveffâ-yı mezbûrun li-ebeveyn ammi ve usûbet-i nesebiye cihetinden vârisi olup zîrâ müteveffâ-yı mezbûrun babası Ömer Ağa ile benim babam Mustafa li-ebeveyn karındaşlardır babaları Marko ve anaları Maro ve dedeleri Kino ve maskat-ı re’simiz karye-i mezbûredir. Müteveffâ-yı mezbûrun verâseti benim ile mezbûretân Âişe ve Âmine’ye münhasıra iken mezbûre Âmine tereke-i müteveffâ-yı mezbûrun mecmû‘unu kabz edip bana aid olan altı sehimden iki sehm hissemi vermede ta‘allül eder suâl olunup teslîme tenbîh olunmak murâdımdır dedikde gıbbe’s-suâl mezbûre Âmine tereke-i müteveffâ-yı mezbûra vaz‘-ı yedini ikrâr müdde‘î-i merkūmun verâsetini inkâr edicek müdde‘î-i mezbûrdan müdde‘âsını mübeyyine beyyine taleb olundukda karye-i mezbûre sükkânından Ali Beşe b. Sinan ve Bayram Beşe b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Hüseyin Beşe müteveffâ-yı mezbûrun li-ebeveyn ammi ve usûbet-i nesebiye cihetinden vârisidir zîrâ müteveffâ-yı mezbûrun babası mezbûr Ömer Ağa müdde‘î-i merkūmun babası merkūm Mustafa li-ebeveyn karındaşlar olup babaları Marko ve anaları Maro ve dedeleri Kino ve maskat-ı re’simiz zikrolunan Malkoç nâm karyedir müteveffâ-yı mezbûrun verâseti mezbûr Hüseyin ile cedde-i sahîhası mezbûre Âmine ve li-ebeveyn kız karındaşı mezbûre Âişe’ye münhasıradır bunlardan gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hüküm mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hasan Beşe b. Şaban, İsmail Çelebi b. Mehmed, Resûl b. Rıdvan, Mehmed b. Ramazan.