İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 856 Hüküm no: 1045 Orijinal metin no: [146b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cennet bt. Ali’nin yarım menzil hissesini boşandığı kocası Hacı Ahmed b. Mehmed’e sattığını ikrar ettiği Mahmiye-i Galata muzâfâtından kasaba-i Tophâne’de Cihangir mahallesinde sâkin el-Hâc Ahmed b. Mehmed meclis-i şer‘-i şerîf-i lâzımü’t-teşrîfde zevce-i mutallakası Cennet bt. Ali nâm hatun mahzarında üzerine takrîr-i da‘vâ edip mahalle-i mezbûrede vâki‘ bir tarafı Âişe Hatun menziline ve bir tarafı Süleyman Ağa mülküne ve bir tarafı el-Hâc Süleyman Vakfı’na ve bir tarafı tarîk-i âmma müntehî büyût-ı adîdeyi hâvî menzilin nısfı benim ve nısf-ı âharı mezbûre Cennet Hatun’un mülkü olmağla mezbûre Cennet nısf hisse-i şâyi‘asını bana on dört bin akçeye bey‘ ve teslîm ben dahi iştirâ ve kabûl ve kabz ve tesellüm eyledikden sonra semen-i mezbûr on dört bin akçeyi merkūme Cennet’e bi’t-tamam teslîm ol dahi ahz u kabz etmiş iken mezbûre Cennet benimle mu‘arazadan hâlî değildir suâl olunup mu‘ârazadan men‘ olunması murâdımdır dedikde gıbbe’s-suâl mezbûre Cennet vech-i muharrer üzere menzil-i mahdûd-ı mezbûrda mülküm olan nısf hisse-i şâyi‘amı merkūm el-Hâc Ahmed’e semen-i mezbûr on dört bin akçeye bey‘ ve teslîm ol dahi iştirâ ve kabûl ve tesellüm eyledikden sonra meblağ-ı mezbûr on dört bin akçeyi merkūme Cennet [merkūm Ahmed] yedinden bi’t-tamam ahz u kabz eyledim deyü bi-tav‘ihâ ikrâr ve i‘tirâf etmeğin ikrârı mûcebince mezbûre Cennet mu‘arazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Çavuş b. Abdullah, Yusuf b. Abdullah, İsmail b. ( ), Hüseyin.