İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 857 Hüküm no: 1047 Orijinal metin no: [147a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb b. İvaz’ın tasarrufunda bulunan vakıf odanın oturma hakkını rızasıyla kız kardeşinin oğlu Mehmed b. Zülfikâr’a devrettiği Hüccet-i tevcîh. Merhûm el-Hâc Abdülbaki mahmiye-i Kostantıniyye mahallâtından Hoca Üveys mahallesinde vâki‘ birbirine muttasıl beş bâb hucurâtın süknâsını sülahâ-yı mütezevvicînden kırâet-i Kur’ân’a kādir kimesneler bulunursa bir cüz’-i şerîf tilâvet edip ona kādir olmazsa sûre-i Yâsin-i şerîf ona kādir değil ise sûretü’l-Mülk ona kādir değil ise üç sûre-i İhlâs birer Mu‘avvizeteyn bir Fâtiha-i şerîfe tilâvet etmek üzere birer kimesneye şart etdiği hucurât-ı hamseden etrâf-ı selâsesi vakf-ı mezbûr ve bir tarafı tarîk-i âm ile mahdûd olan hücrede sâkin olan Eyüb b. İvaz[‘ın] kız karındaşı oğlu Mehmed b. Zülfikar süknâya eşedd-i ihtiyâcı ve her vechile mahall ü müstahık olmağın hüsn-i ihtiyârı ile ferâgat etdikde kıbel-i şer‘-i mergūbdan mezbûr Mehmed’e tevcîh olunup işbu vesîka alâ-mâ hüve’l-hakīka ketb olunup mezbûr Mehmed’in yedine def‘ olundu. Tahrîren fi’l-yevmi’s-sâdis ve’l-işrîn min-Zilhicceti’ş-şerîfe li-sene 1072 Şuhûdü’l-hâl: Fahrü’l-kuzât Hasan Efendi, es-Seyyid Halil Efendi b. es-Seyyid Mehmed el-imâm, Hasan Efendi el-imâm, Mustafa Efendi, el-Hâc Süleyman b. el-Hâc Salih, Mehmed Efendi b. Mustafa, Abdullah b. Mustafa.