İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 857 Hüküm no: 1048 Orijinal metin no: [147a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenan b. Abdullah’ın yaptığı bina ile Muharrem Ağa b. Abdi’nin damlalığını kapattığının yapılan keşif sonucunda anlaşıldığı Hüccet-i ihbâr. Mahmiye-i İstanbul’da Ayasofya-i kebîr kurbünde Kabasakal Sinan Ağa mahallesinde sâkin Muharrem Ağa b. Abdi meclis-i şer‘de takrîr-i kelâm edip mahalle-i mezbûrede vâki‘ ma‘lûmü’l-hudûd menzilimin önünde vâki‘ kârgir kemer Kasım Ağa nâm sahibü’l-hayrın vakfından olup zikrolunan kemerin fevkīsinden yüz akçe mukāta‘a ile benim tasarrufumda damlalığım olup ve tahtı yine vakf-ı mezbûrun müte’ehhilîn odaları olmağın marrü’z-zikr odalardan ma‘lûmü’l-hudûd bir bâb odaya icâre-i mu‘accele ve mü’eccele-i ma‘lûmeteyn ile mutasarrıf olan Kenan b. Abdullah nâm kimesne zikri mürûr eden kemerin arzan bir zirâ‘ yerini hedm edip ve üstüne taban bindirip fuzûlen binâ ihdâs etmekle benim menzilimin damlalığını sed etmişdir kıbel-i şer‘den üzerine varılıp ba‘de’n-nazar tahrîr olunması matlûbumdur dedikde savb-ı şer‘den Mevlânâ Mehmed Efendi irsâl olunup ol dahi hâssa mi‘mârlardan Üstâd Ahmed Halîfe b. Ahmed ve Ali Halîfe b. Abdullah ile zikrolunan kimseler üzerine varılıp vakf-ı mezbûrun mütevellîsi olan Ahmed Ağa’nın kāimmakāmı Mehmed Ağa huzûrunda ba‘de’l-keşf ve’n-nazar mezbûr Kenan mârrü’z-zikr kemerin bir zirâ‘ı yerini hedm ve üstüne taban bindirip binâ ihdâs eylediği mu‘âyene ve müşâhede olundukdan sonra fi’l-hakīka sâlifü’z-zikr kemerin fevki mezbûr Muharrem Ağa’nın tasarrufunda olup menzilinin kadîm damlalığı olduğu zeyl-i kitâbda muharrerü’l-esâmî olan Müslimîn ihbâr eylediklerinde vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin b. Davud ve Mehmed b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Zilhicceti’ş-şerîfe li-sene 1072. Şuhûdü’l-hâl: Umdetü’l-emâcid ve’l-ayân Ahmed Ağa ser-bevvâbân-ı sultanî, Kıdvetü erbâbü’t-tahrîr ve’r-rakām Sabri Mehmed Efendi, Ali Efendi b. Ahmed, Fahrü’l-kuzât İbrahim b. Ahmed Efendi, Abdullah Efendi el-imâm, Ali Çelebi b. Muharrem, Receb Çelebi b. İbrahim el-müezzin, Arslan Ağa b. Nuh, Ahmed Ağa b. Ali, Mustafa Çelebi b. Ali ve Mehmed Çelebi b. Abdi.