İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 867 Hüküm no: 1061 Orijinal metin no: [148b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ermeni Safer’in Şeyhferhad mahallesindeki menzil arsasının varisleri tarafından Karabit v. Reyhan’a satıldığı Verâset hüccetidir. Mahmiye-i İstanbul’da Şeyhferhad mahallesinde sâkin iken bundan akdem hâlik olan Safer nâm Ermeni’nin verâseti sulbî kebîr oğulları Asvador ve Avraham’a ve sulbiye kebîre kızları Şehzede ve Heva’ya münhasıra ve asl-ı mes’eleleri altı sehimden olup sihâm-ı mezbûrenin ikişer sehmi mezbûrân Asvador ve Avraham’a ve birer sehmi mezbûretân Şehzede ve Heva’dan her birine isâbet eylediği zâhir ve müteayyin oldukdan sonra mezbûrân Asvador ve Avraham asîl ve mezbûretân Şehzede ve Heva taraflarından husûs-ı âti’z-zikre vekîl olup Yasef v. Saer ve İshak v. Şehbaz şehâdetleri ile şer‘an vekâleti sâbite olan Menteşe v. Yerom meclis-i şer‘-i hatîrde işbu bâ‘isü’r-rakīm Karabit v. Reyhan muvâcehesinde ikrâr ve i‘tirâf edip mahalle-i mezbûrede vâki‘ bir tarafı Cizyecibaşı Vakfı’na ve bir tarafı Çavuşzâde menziline ve bir tarafı vakıf odalara ve bir tarafı tarîk-i âmma müntehî muhterik menzil [149a] arsası hâlik-i mezbûrun ile’l-helâk mülkü olup ba‘de helâkihî veresesine isâbet ve intikāl etmiş idi el-hâletü hâzihî arsa-i mezbûreyi merkūm Karabit’e târih-i kitâbdan beş ay mukaddem yirmi bin akçeye asâleten ve vekâleten bey‘ ve teslîm ol dahi vech-i muharrer üzere iştirâ ve kabûl ve kabz eyledikden sonra semen-i mezbûr yirmi bir bin akçe merkūm Karabit yedinden ahz u kabz eyledik dedikde gıbbe’t-tasdîkı’ş-şer‘î ma vaka‘a bi’t-taleb ketb olundu. Fi’l-yevmi’s-sâdis ve’l-işrîn min-Zilhicceti’ş-şerîfe li-seneti isneteyn ve seb‘în ve elf. Şuhûdü’l-hâl: Abdi b. Hüseyin, Mehmed b. Ramazan, Resûl b. Rıdvan, Hasan b. Bayram.