İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 866 Hüküm no: 1060 Orijinal metin no: [148b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ahmed’in menzilinin saçak damlaları ile pis sularının vakıf kuyuya akmasına Abdülmümin b. Abdullah’a müdahale ettirilmemesi Hüccet, damlayı men‘ hüccetidir.. Husûs-ı âti’l-beyânın mahâllinde tahrîri iltimâs olunmağın savb-ı şer‘-i mutahhardan Mahmud Efendi irsâl olunup ol dahi mahmiye-i İstanbul’da merhûm Mustafa Efendi Vakfı’ndan olup icâre-i mu‘accele ve mü’eccele-i ma‘lûmeteyn ile mutasarrıf olan Abdülmümin’in vakıf menziline varıp zeyl-i vesîkada mastûrü’l-esâmî Müslimîn huzûrunda akd-i meclis-i şer‘ etdikde Ali b. Ahmed meclis-i ma‘kūd-ı mezbûrda Abdülmümin [b.] Abdullah mahzarında üzerine da‘vâ ve takrîr-i kelâm edip hâlâ tasarrufumda olan vakıf menzilin saçaklarının damlası ve çirkâbı kadîmden hafr olunan vakıf kuyuya ma‘rifet-i mütevellî ile mezbûr Abdülmümin Bey’in havlusundan cereyân edegelmiş iken hâlâ mezbûr Abdülmümin [b.] Abdullah mecrâ-yı kadîmine icrâya mâni‘ olur vâki‘u’l-hâl işbu hâzırûn bi’l-meclis olup mahalle-i mezbûre sâkinlerinden İsa b. Ömer ve Dilaver b. Abdullah ve Ali b. Mustafa ve Ahmed b. Ali nâm kimesnelerden suâl olunsun dedikde mezbûr Abdülmümin ile vakf-ı mezbûr mütevellîsi kāimmakāmı olan İbrahim Efendi muvâcehelerinde mezbûrdan suâl olundukda fi’l-vâki‘ müdde‘î-i mezbûrun vakıf menzili saçaklarının damlası ve çirkâbı kadîmden hafr olunan vakıf kuyuya mezbûr Abdülmümin’in havlusundan cereyân edegelmişdir deyü her birleri haber vermeğin vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Zilhicce li-sene isneteyn ve seb‘în ve elf. Şuhûdü’l-hâl: Mehmed Çelebi b. Ali, Hüseyin b. Mustafa meydânlı, Ahmed b. Mustafa, Ömer b. ( ), Mehmed b. İbrahim meydânlı, Ahmed b. Receb.