İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 868 Hüküm no: 1063 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Nahum v. İlyazar’ın alacak hususunda Ayşe bt. Mustafa Paşa ve Süleyman Ağa b. Abdullah ile sulh olup sulh bedelini ödemeleri için kırk gün süre verdiği Hüccet-i tecîl. Mahmiye-i İstanbul’da Dimetoka cemâ‘atinden Nahum v. İlyazar nâm Yahûdî meclis-i şer‘de sâbıkā vezîriazam olan Mustafa Paşa’nın kerîmesi Âişe Hanım ile zevci Süleyman Ağa b. Abdullah mahzarında ikrâr edip târih-i kitâbdan on sene mukaddem onu bir dirhem akçe ile yedimden müşterâ kereste semeninden merkūmân Âişe Hanım ve Süleyman Ağa zimmetlerinde olan iki yük yirmi bir bin akçe hakkımın altmış sekiz bin akçesini bir defa ve otuz iki bin akçesini defa-i sâniyede alıp bâkī kalan yüz yirmi bir bin akçe dahi onu bir dirhem akçe lâzım geldiğine hâlâ şeyhülislâm ve müfti-i kâffetü’l-enâm hazretlerinden yedinde olan fetvâ-yı şerîfe mûcebince merkūmândan onu bir dirhem akçe taleb ve mahmiye-i merkūmede vâki‘ Dâye Hatun mahallesinde vâki‘ Rüstem Paşa Vakfı’ndan müşârün-ileyhâ icâre-i mu‘accele ve yevmî dört akçe mü’eccele ile mutasarrıfe olduğu lede’l-ahâlî ma‘lûmü’l-hudûd üç bâb tahtânî ve fevkānî odaları müştemil menzilini târih-i kitâbdan üç sene mukaddem mütevellîsi izni ile elli beş bin akçe bedel mukābelesinde tefevvüz ve kabûl edip on bir ay tasarrufumdan sonra muhterik olup arsa-i sırfa kaldıkda süknâsı ile istifâ eylediğim akçeden fazlasını istirdâd [ve] ahza kādir olduğuma mûmâ-ileyh efendi hazretlerinden yedimde olan fetvâ-yı şerîfe mûcebince da‘vâ-yı istirdâd eylediğimde merkūmân dahi meblağ-ı mezbûrun yüz yetmiş üç bin akçesini sana verdik hâlâ kırk sekiz bin akçe deynimiz bâkī kaldı ve on bin akçe kıymetli dikme sırmalı bir ocak yaşmağımızı aldın deyü benden da‘vâ eylediklerinde ben dahi inkâr edip beynimizde münâza‘ât-ı kesîre vâkı‘a olmağla muslihûn tavassut etmekle zikrolunan da‘vâlardan benim ile yetmiş sekiz bin akçe üzerine sulh olduklarında ben dahi minvâl-i muharrer üzere sulhu kabûl ve bedel-i sulh olan yetmiş sekiz bin akçeyi hâlâ edâya kudretleri olmayıp istimhâl eylediklerinden ben dahi târih-i kitâbdan kırk gün tamamına dek bana teslîme tecîl eylediğimde merkūmân Âişe Hanım ve Süleyman Ağa ecel-i mezbûru kabûl edip eyyâm-ı merkūme tamamında bana teslîme ta‘ahhüd eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilhicceti’ş-şerîfe li-sene 1072. Şuhûdü’l-hâl: Hüseyin Efendi el-Burûsî kâtib-i ….?, Mustafa Çavuş, Ahmed Çelebi b. Mehmed kethudâ-yı muhzırân, Keşfî Mustafa Efendi el-kâtib, Abdi b. Hüseyin el-muhzır, Şükrullah b. Mustafa, Ahmed Efendi el-kādî, el-kâtib.