İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 869 Hüküm no: 1064 Orijinal metin no: [149a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hasan’ın mehir ve nafaka hususunda boşandığı kocası Mehmed Beşe b. Hasan’ın zimmetini ibra ettiği Hüccet-i ibrâ. Mahmiye-i İstanbul’da Şehzâde Sultan Mehmed Han Câmi‘-i şerîfi kurbünde sâkine Âişe bt. Hasan nâm hatun meclis-i şer‘de zevci işbu bâ‘isü’l-kitâb Mehmed Beşe b. Hasan mahzarında ikrâr ve takrîr-i kelâm edip ben retkādan olmağla mezbûr Mehmed Beşe beni bundan akdem talâk-ı bâyin ile tatlîk etmeğin zimmetine lâzım gelen bin beş yüz akçe mehr-i mü’eccelimin nısfı olan yedi yüz elli akçe ile nafaka-i iddet-i ma‘lûme ve me’ûnet-i süknâm için üç yüz yirmi akçe ki cem‘an bin yetmiş akçeyi mezbûr Mehmed Beşe yedinden tamamen ahz u kabz edip zevciyete müte‘allika da‘vâdan mezbûrun zimmetini ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’t-tâsi‘ ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Baba Resûl b. Rıdvan, Hüseyin b. Mahmud, Veli b. Mahmud, Hasan b. Mustafa.