İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 880 Hüküm no: 1080 Orijinal metin no: [151a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed’in tasarrufunda olan vakıf menzilin kullanım hakkını Andelib bt. Abdullah’a devrettiği Mahmiye-i İstanbul’da Beyceğiz mahallesi ahâlîsinden Ahmed Çelebi b. Mehmed nâm râcil meclis-i şer‘de Andelib Hatun bt. Abdullah tarafından husûs-ı câ’îyi tasdîka vekîl olan iftihârü’l-müderrisîni’l-kirâm Mustafa Efendi mahzarlarında ikrâr ve takrîr-i kelâm edip mahmiye-i merkūmede sâbıkā şeyhülislâm olan merhûm Hüseyin Efendi Vakfı’ndan olup mahalle-i merkūmede vâki‘ bir tarafı vakf-ı mezbûrdan Safâ Hatun tasarrufunda olan menzile ve bir tarafı yine vakf-ı mezbûrdan Piyale b. Abdullah tasarrufunda olan menzile ve bir tarafı mahalle-i merkūme mescid-i şerîfi imâmına meşrûta bahçeye ve bir tarafı tarîk-i âmma müntehî olup icâre-i mu‘accele ve yevmî bir akçe ücret-i mü’eccele ile mutasarrıf olduğum iki bâb fevkānî ve bir bâb tahtânî odaları ve fevkānî bir sofayı ve bi’r-i mâ’ı ve kenîfi ve zât-ı eşcâr-ı müsmire ve gayr-ı müsmire bahçeyi müştemil menzili mütevellîsi fahrü’l-akrân işbu Mehmed Ağa izni ile kırk iki bin beş yüz akçe bedel mukābelesinde müvekkile-i merkūme Andelib Hatun’a ferâğ ve tefvîz olduğu ber-minvâl-i muharrer tefevvüz ve kabûl edip bedel-i ferâğ olan kırk iki bin beş yüz akçeyi yedinden tamamen alıp kabz edip min-ba‘d menzil-i mezbûr müvekkile-i merkūme Andelib Hatun’un hakk-ı müfevvazı olup emsâli mutasarrıf olduğu gibi mutasarrıfe olsun dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: İftihâru’l-müderrisîni’l-kirâm Ârif Mehmed Efendi, Fahrü’l-akrân Mehmed Bey b. Fazlı Paşa, Mehmed Efendi b. Mahmud kâtib-i muhâsebe, Ali Çelebi b. Mehmed kâtib-i muhâsebe, Fahrü’l-akrân Mehmed Ağa, Ahmed Çelebi b. Yusuf.