İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 879 Hüküm no: 1079 Orijinal metin no: [151a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah’ın bazı eşyalarını Hatice bt. Yusuf’a hibe ettiği Hîbe hüccetidir. Mahmiye-i İstanbul’da Kalenderhâne mahallesi sâkinelerinden Belkıs bt. Abdullah nâm hatun tarafından husûs-ı âtîye vekîl olup mezbûrenin zâtını ma‘rifet-i şer‘iye ile ârifân Mehmed Ağa b. Mustafa ve Bayram b. Abdullah şehâdetleri ile şer‘an vekâleti sâbite olan Veli Çelebi b. Musa meclis-i şer‘de müvekkile-i mezbûrenin rebîbesi işbu râfi‘atü’l-kitâb Hadîce bt. Yusuf mahzarında bi’l-vekâle ikrâr ve i‘tirâf edip müvekkilem mezbûre silk-i mülk-i sahîhinde münselik olan eşyâsından dört çatma yasdık ve iki köhne beledî minder ve iki köhne beledî döşek ve iki yemenî yorgan ve bir köhne Yanbolu kebesi ve bir beyaz velençe ve bir kırmızı ihrâm ve iki tencere ve dört ayaklı sahan ve bir yeşil kutnî kaftan ve bir çift küpe ve bir bütün sîm raht kuşak ve iki köhne Selanik keçesi ve bir dârâyî kaftan ve bir kahve ibriğini mezbûre Hadîce Hatun’a hîbe-i sahîha-i şer‘iye ile hîbe ve temlîk ve teslîm ol dahi meclis-i hîbede ittihâz ve kabûl ve kabz eyledi ba‘de’l-yevm zikrolunan merkūme Hadice’nin mülk-i mevhûbu olmuşdur dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-işrîn min-Zilhicceti’ş-şerîfe li-sene isneteyn ve seb‘în ve efl. Şuhûdü’l-hâl: Mefharu’l-eimme Mehmed Efendi el-imâm, Ahmed Efendi b. ( ), Abdülkadir Çelebi b. ( ), Bayram Beşe b. ( ), Osman Beşe b. ( ).