İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 885 Hüküm no: 1089 Orijinal metin no: [151b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rüstem Ağa b. Hüseyin’in eşyalarını çalmadıklarına hizmetkârları Receb b. Hızır ve Mehmed b. Mustafa’ya yemin verdirildiği Mahmiye-i İstanbul’da Aksaray kurbünde Mihaloğlu menzilinde sâkin mefharu’l-emâsil ve’l-a‘yân Rüstem Ağa b. Hüseyin meclis-i şer‘-i şerîf-i lâzımü’t-teşrîfde hizmetkârları işbu bâ‘iseyi’r-rakīm Receb b. Hızır ve Mehmed b. Mustafa mahzarlarında üzerlerine takrîr-i da‘vâ edip târih-i kitâbdan yedi gün mukaddem sâkin olduğum menzilden gece ile eşyâ-i memlûkemden yirmi sekiz guruş kıymetli bir sîm kılıç ve on altı guruş kıymetli bir sîm resmem zâyi‘ olup mezbûrân Receb ve Mehmed’i mazanne îcâd etmişimdir mezbûrândan suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ zikrolunan bir sîm kılıç ve resmeyi mezbûr Rüstem Ağa’nın menzilinden gece ile ahz u kabz etmeyip üzerlerine reddi lâzım olmadığına mezbûrân Receb ve Mehmed’e yemîn teklîf olundukda onlar dahi alâ-vefki’l-mesûl yemîn billâhi te‘âlâ etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Muharremi’l-harâm li-sene selâse ve seb‘în ve elf. Şuhûdü’l-hâl: Murad Beşe b. Mehmed, İbrahim Beşe b. Mustafa, Abdi b. Hüseyin, Hasan b. Bayram.