İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 887 Hüküm no: 1093 Orijinal metin no: [152a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Efendi b. Mehmed’in merhum Hüseyin Efendi’de olan alacağını terekesinden tahsil ettiği Husûs-ı âti’l-beyânın mahâllinde istimâ‘ ve tahrîri iltimâs olmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Debbağzâde mahallesinde vâki‘ merhûm Hüseyin Efendi b. Mehmed Beşe’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mahalle-i mezbûrede sâkin işbu râfi‘u’l-kitâb Ebûbekir Efendi b. Mehmed meclis-i ma‘kūd-ı mezbûrda müteveffâ-yı mezbûrun babası ve sagīre kızı Fâtıma’nın vasîyy-i şer‘îsi olmağla muhallefâtına vâzı‘u’l-yed olan mezbûr Mehmed Beşe mahzarında üzerine da‘vâ edip müteveffâ-yı mezbûr Hüseyin Efendi’ye hâl-i hayatında otuz üç esedî guruş ikrâz ve teslîm ol dahi yedimden iktirâz ve tesellüm ve kabz eyledikden sonra kable’l-edâ vefât edip tereke-i vâfiyesine bi-hasebi’l-vesâye vâzı‘u’l-yed olmağın suâl olunup alıverilmek taleb ederin dedikde gıbbe’s-suâl ve’l-inkâr ve akībe’l-istişhâd udûl-i ricâl-i Müslimînden olup mahmiye-i mezbûrede Emir Buhârî mahallesi sükkânından Ali Efendi b. Şaban ve Ali b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr müteveffâ-yı mezbûr Hüseyin Efendi’ye hâl-i hayatında bizim huzûrumuzda otuz üç esedî guruş ikrâz ve teslîm ol dahi iktirâz ve meblağ-ı mezbûru ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ hîbe veyâ âhara havâle veyâ turûk-ı şer‘iyeden bir tarîk ile müteveffâ-yı mezbûrun zimmetini ibrâ ve ıskāt etmediğine yemîn teklîf eyledikde ol dahi alâ-mâ hüve’l-mesûl halfü billâhi’l-aliyyü’l-azîm etmeğin mûcebince ba‘de’l-hükm mezbûr Ebûbekir Efendi meclis-i mezbûrda vasîyy-i mezbûr muvâcehesinde ikrâr edip hükm-i şer‘î lâhık olan meblağ-ı mezbûru vasîyy-i mezbûr yedinden alıp kabz eyledim dediğin mevlânâ-yı mezbûr vâki‘ hâli mahâllinde [152b] istimâ‘ ve tahrîr ve hükmedip ba‘dehû ma‘an irsâl olunan Sarrâc Ali Beşe b. Mustafa ile gelip meclis-i şer‘de inhâ ve takrîr etmeğin mevlânâ-yı mezkûrun hükmü tenfîz olunup mâ-vaka‘a bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: es-Sâbıkūn