İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 888 Hüküm no: 1094 Orijinal metin no: [152b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Efendi b. Abdullah’ın merhum Hüseyin Beşe’de olan alacağını terekesinden tahsil ettiği Husûs-ı âti’l-beyânın mahâllinde istimâ‘ ve tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Debbağzâde mahallesinde vâki‘ merhûm Hüseyin Efendi b. Mehmed Beşe’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde Galata’ya tâbi‘ kasaba-i Kasımpaşa’da Kabakulak mahallesinde sâkin Ebûbekir Efendi b. Abdullah tarafından husûs-ı câ’i’z-zikre vekîl olup vekâleti Ömer Beşe b. Mehmed ve diğer Ebûbekir Efendi b. Mehmed şehâdetleri ile şer‘an vekâleti sâbite olan Ahmed Efendi b. Mehmed meclis-i ma‘kūd-ı mezbûrda müteveffâ-yı mezkûrun babası ve sagīre kızı Fâtıma’nın vasîyy-i şer‘îsi olmağla muhallefâtına vâzı‘u’l-yed olan mezbûr Mehmed Beşe mahzarında üzerine da‘vâ edip müvekkilim mezbûr Ebûbekir Efendi müteveffâ-yı mezbûra hâl-i hayatında kırk esedî guruş ikrâz ve teslîm edip ol dahi iktirâz ve tesellüm ve kabz eyledikden sonra meblağ-ı mezbûru müvekkilime kable’l-edâ mezbûr Hüseyin Efendi vefât edip terekesine bi-hasebi’l-vesâye vaz‘-ı yed etmeğin suâl olunup müvekkilim için taleb ederim dedikde gıbbe’s-suâl ve akībe’l-inkâr ve akībe’l-istişhâd udûl-i ricâl-i Müslimînden olup müteveffâ-yı mezbûrun karındaşları Mustafa Beşe b. Mehmed ve Ebûbekir Efendi b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müvekkil-i mezbûr Ebûbekir Efendi müteveffâ-yı mezbûra hâl-i hayatında bizim huzûrumuzda kırk esedî guruş ikrâz ve teslîm ol dahi iktirâz ve kabz ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ hîbe veyâ âhara havâle veyâ turûk-ı şer‘iyeden bir tarîk ile [müteveffâ-yı mezbûrun] zimmetini ibrâ ve ıskāt etmediğine müvekkil-i mezbûr Ebûbekir Efendi’ye yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin ba‘de’l-hükm mezbûr Ebûbekir Efendi meclis-i mezbûrda vasîyy-i merkūm muvâcehesinde ikrâr edip edâsına hükm-i şer‘î lâhık olan meblağ-ı mezbûr kırk esedî guruşu vasîyy-i mezbûr yedinden tamamen alıp kabz eyledim dediğin mevlânâ-yı mezbûr mahâllinde tahrîr ve hükmedip ba‘dehû ma‘an irsâl olunan Sarrâc Ali Beşe b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mevlânâ-yı mezbûrun hükmü tenfîz olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis min-Muharremi’l-harâm li-sene selâse ve seb‘în ve elf. Şuhûdü’l-hâl: es-Sâbıkūn