İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 891 Hüküm no: 1097 Orijinal metin no: [153a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Şaban b. Hacı İsmail’in ölen Habbaz Sefer v. Şamek’te kırk bin akçe alacağı olduğuna yemin ettiği İşbu râfi‘u’l-kitâb el-Hâc Şaban b. el-Hâc İsmail meclis-i şer‘-i şerîfde medîne-i Hazret-i Ebî Eyyûb-i Ensârî’de Kapı Ağası fırınında habbâz iken hâlik olan Sefer v. Şamek nâm Ermeni’nin evlâd-ı sıgārının vasîyy-i şer‘îleri olmağla terekesine vâzı‘u’l-yed olan Asar v. Hozik nâm zimmî mahzarında üzerine da‘vâ edip hâlik-i mezbûr zimmetinde on dört re’s bargir bahâsından on altı bin akçe ve cihet-i karzdan yirmi dört bin ki cem‘an kırk bin akçe hakkım olup hatta hâl-i hayatında meblağ-ı mezbûru taleb eylediğimde huzûr-ı şuhûdda minvâl-i muharrer üzere bana kırk bin akçe deyni olduğunu ikrâr ve işhâd eyledikden sonra kable’l-edâ hâlik olup cümle-i terekesine vasîyy-i mezbûr vâzı‘u’l-yed olmağın taleb ederin suâl olunsun dedikde gıbbe’s-suâl ve’l-inkâr müdde‘î-i mezbûr el-Hâc Şaban’dan da‘vâsına mutâbıka beyyine taleb olundukda udûl-i Müslimînden olup hâlâ habbâzlar kethudâsı olan Mehmed b. el-Hâc Ali nâm kimesne ile fırın-ı mezbûrda ekmekçi tâifesinden Karabet v. Haçarek nâm zimmî li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr el-Hâc Şaban hâlik-i mezbûrdan hâl-i hayatında meblağ-ı mezbûru taleb eylediğinde on dört re’s bargir bahâsından on altı bin akçe cihet-i karzdan yirmi dört bin akçe ki cem‘an bizim huzûrumuzda kırk bin akçe deyni olduğunu ikrâr ve bizi işhâd eyledi idi biz bu vech üzere hâlik-i mezbûrun ikrârına şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ hîbe veyâ âhara havâle veyâ turûk-ı şer‘iyeden bir tarîk ile hâlik-i mezbûrun zimmetini ibrâ ve ıskāt etmediğine müdde‘î-i mezbûr el-Hâc Şaban’a yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Abdi Çelebi b. Hüseyin, Baba Rasûl b. Rıdvan, Şükrullah b. Mustafa, Baba Hasan b. Mustafa, Mehmed b. Mehmed el-muhzır, el-Hâc Hüseyin b. el-Hâc Abdülcelil, Mehmed b. Hüseyin, Mehmed Bey el-cündî.