İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 890 Hüküm no: 1096 Orijinal metin no: [152b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmi bt. Mustafa’nın tasarrufunda olan vakıf menzilin mahlûl zannıyla başkasına verilmesinin usulsüz olduğu Mahmiye-i İstanbul’da Tercüman Yunus mahallesinde sâkine İsmi bt. Mustafa nâm hatun mahfil-i kazâda zikri âtî vakıf menzile vâzı‘atü’l-yed olan Aynî bt. Selim nâm hatun [ve] vakf-ı mezbûr mütevellîsi olan Ahmed b. Mehmed mahzarında üzerine da‘vâ ve takrîr-i kelâm edip mahmiye-i mezbûrede Hüsrev Paşa mahallesinde vâki‘ yine Hüsrev Paşa Vakfı’ndan olup lede’l-ahâlî ve’l-cîrân ma‘lûmü’l-hudûd icâre-i mu‘accele ve beher şehr on beş akçe ücret-i mü’eccele ile bir bâb tahtânî odayı yirmi seneden beri mutasarrıfe olup ücret-i mü’eccele-i mezbûre beher şehr cânib-i vakfa verilir iken ben iki sene âhar diyâra gittiğimde bilâ-veled fevt ve menzil-i mahdûd-ı mezbûr vakfa intikāl eyledi deyü mezbûr Aynî’ye bedel-i ma‘lûma tefvîz eylemişdir suâl olunup kasr-ı yedine tenbîh olunması matlûbumdur dedikde gıbbe’s-suâl ve’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden olup mahalle-i mezbûre sükkânından Osman b. Mehmed ve Mehmed Beşe b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ zikri mürûr eden vakıf menzile mezbûre İsmi’nin yirmi seneden beri icâre-i mu‘accele ve mü’eccele ile mutasarrıfe olup beher şehr cânib-i vakfa ücret-i mü’eccelesini verip menzil-i mezbûru bizim huzûrumuzda mutasarrıfedir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın menzil-i mezbûrdan mezbûre Aynî’nin kasr-ı yedine tenbîh birle mâ-vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Şaban Beşe b. Abdi, Abdi Çelebi b. Hüseyin, Yusuf b. Mehmed, Mehmed Çelebi b. Halil, Mustafa Çelebi [b.] Hasan, Rasûl b. Rıdvan.