İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 892 Hüküm no: 1099 Orijinal metin no: [153a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın merhum Hüseyin Efendi’de olan alacağını terekesinden tahsil ettiği Husûs-ı âti’l-beyânın mahâllinde iltimâs [istimâ‘] ve tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Debbağzâde mahallesinde vâki‘ merhûm Hüseyin Efendi b. Mehmed Beşe’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mahalle-i mezbûrede sâkin işbu râfi‘u’l-kitâb Ali b. Abdullah nâm kimesne meclis-i ma‘kūd-ı mezkûrda müteveffâ-yı mezkûrun babası ve sagīre kızı Fâtıma’nın vasîyy-i şer‘îsi olmağla muhallefâtına vâzı‘u’l-yed olan mezbûr Mehmed Beşe mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Efendi’ye hâl-i hayatında bin yüz kırk akçe ikrâz ve teslîm ol dahi yedimden ahz ve tesellüm ve kabz eyledikden sonra kable’l-edâ vefât edip bi-hasebi’l-vesâye vâzı‘u’l-yed olmağla suâl olunup tereke-i vâfiyesinden alıverilmek taleb ederim dedikde gıbbe’s-suâl ve’l-inkâr ve akībe’l-istişhâd udûl-i ricâl-i Müslimînden olup mahalle-i mezbûre sükkânından Ahmed Efendi b. Mehmed ve Ebûbekir Efendi b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr müteveffâ-yı mezbûr Hüseyin Efendi’nin hâl-i hayatında bizim huzûrumuzda bin yüz kırk akçe ikrâz ve teslîm ol dahi iktirâz ve meblağ-ı mezbûru ahz u abz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ hîbe veyâ turûk-ı şer‘iyeden bir tarîk ile müteveffâ-yı mezbûrun zimmetini ibrâ ve ıskāt etmediğine mezbûr Ali’ye yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin ba‘de’l-hükm mezbûr Ali meclis-i mezbûrda vasîyy-i mezbûr muvâcehesinde ikrâr edip edâsına hükm-i şer‘î lâhık olan meblağ-ı mezbûr bin yüz kırk akçeyi tamamen vasîyy-i mezbûr yedinden alıp kabz eyledim dediğini mevlânâ-yı mezbûr mahâllinde istimâ‘ ve tahrîr ve hükmedip ba‘dehû ma‘an irsâl olunan Sarrâc Ali Beşe b. Mustafa ile gelip meclis-i şer‘de alâ-vukū‘ihî inhâ ve takrîr etmeğin mevlânâ-yı mezbûrun hükmü tenfîz olunup mâ-vaka‘a bi’t-taleb ketb olundu. Fi’l-yevmi’s-sâlis mine’l-Muharremi’l-harâm li-sene selâse ve seb‘în ve elf. Şuhûdü’l-hâl: Fahrü’l-eimme Mustafa Efendi b. Süleyman el-imâm, Derviş Mehmed Efendi el-kādî, Mehmed Efendi b. Abdullah el-imâm, Abdullah Efendi b. Hüseyin el-müderris, Mustafa Efendi b. Abdurrahman, Abdi Beşe b. Osman, Hüseyin Çelebi b. Mehmed.