İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 897 Hüküm no: 1106 Orijinal metin no: [154a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mümine bt. Salih Ağa’ya, Mustafa Ağa Vakfı’nın mütevellisi Feridun Çavuş’un elinde bulunduktan sonra kendisine aidiyeti ispat olunan eşyalarının teslimi Mahmiye-i İstanbul’da Gedik Paşa mahallesinde sâkin iken bundan akdem vefât eden Siyavuş Ağa’nın zevce-i metrûkesi işbu bâ‘isetü’l-vesîka Mümine Hatun bt. Salih Ağa tarafından husûs-ı câ’i’z-zikre vekîl olup nehc-i şer‘î ve vech-i mer‘î üzere vekâleti sâbite olan hâlâ zevci Ahmed Ağa b. İbrahim meclis-i şer‘-i hatîrde Yoros kazâsına tâbi‘ Arda? kasabasından merhûm Mustafa Ağa nâm sahibü’l-hayrın vakfına hâlâ mütevellî olan Feridun Çavuş b. Abdullah mahzarında üzerine bi’l-vekâle da‘vâ ve takrîr-i kelâm edip müvekkilem mezbûre Mümine’nin zevc-i sâbıkı mezbûr Siyavuş Ağa nâm kimesne hâl-i sıhhatinde Şâtır Mustafa Ağa nâm kimesneden bin guruş istikrâz ve kabz edip mukābelesinde kendi eşyâsı ile müvekkilemin babası Salih Ağa’dan müntakil mülk-i mevrûsu olan işbu meclis-i şer‘de mevcûd ve müşâr olan iki sîm gaddâre ve iki sîm kılıç ve iki kırmızı kadife üzerinde sırmalı abâyisini izin ve icâzeti yoğiken mezbûr Şâtır Mustafa Ağa katında rehin vaz‘ edip ol dahi rihân-ı mezbûreyi ba‘de’l-kabz kethudâsı olup vakf-ı mezbûra sâbıkā mütevellî olan hazır bi’l-meclis Dilaver Bey b. Abdullah’a teslîm ol dahi bezistânda vakf-ı mezbûrun sandığına vaz‘ eyledikden sonra mezbûr Dilaver Bey tevliyet-i mezbûreden ma‘zûl olup yerine mezbûr Feridun Çavuş mütevellî olmağla hâlâ zikrleri sebk eden iki kılıç ve iki gaddâre ve iki abâyiyi mezbûr Feridun Çavuş yedinde buldum müvekkilem için taleb ederim suâl olunsun dedikde gıbbe’s-suâl mütevellî-i mezbûr Feridun Çavuş cevâbında müvekkile-i mezbûrenin mukaddemâ zevci olan müteveffâ-yı mezbûr Siyavuş Ağa mezbûr Dilaver Bey vakf-ı mezbûra mütevellî iken vakf-ı mezbûr mâlından olmak üzere yedinden yüz altmış dört riyâlî guruş ahz u kabz edip mukābelesinde zikrleri sebk eden iki gaddâre ve iki kılıç ve iki abâyiyi mezbûrun katında rehin vaz‘ edip meblağ-ı mezbûru kable’l-edâ mezbûr Siyavuş Ağa vefât etmekle rehn-i mezbûr [yed[inde kaldı deyü yüz altmış dört guruş iddi‘â ve rihân-ı mezbûre müvekkile-i mesfûrenin mülkü olduğu ma‘lûmum değildir deyip inkâr edicek evvelâ mütevellî-i mezbûrdan müvekkile-i mezbûrenin zevci müteveffâ-yı mezbûr Siyavuş Ağa zimmetinde vakf-ı mezbûr mâlından yüz altmış dört riyâlî guruş olduğunu mübeyyine beyyine taleb olundukda ityân-ı beyyine için mehl-i şer‘î ile imhâl olundukdan sonra meclis-i şer‘a gelip ityân-ı beyyineden izhâr-ı acz eyledikden sonra vekîl-i mezbûrdan rihân-ı mezbûre müvekkile-i merkūmenin mülkü olduğunu mübeyyine beyyine taleb olundukda udûl-i ricâl-i Müslimînden olup mahmiye-i mezbûrede Koğacı mahallesinde sâkin el-Hâc Hüsrev b. Abdullah ve mahrûse-i Üsküdar’da Ağa Hammamı kurbünde sâkin Ömer Çelebi b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu meclis-i şer‘de mevcûd ve müşâr olan iki sîm gaddâre ve iki sîm kılıç ve iki kadife üzerinde sırmalı abâyi müvekkile-i mezbûreye babası Salih Ağa’dan müntakil mülk-i mevrûsudur biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra müvekkile-i mezbûre muhadderâtdan olmağla müteveffâ-yı mezbûr Siyavuş Ağa mütevellî-i sâbık Dilaver Bey yedinden vakf-ı mezbûr mâlından olmak üzere yüz altmış dört guruş aldığını müvekkile-i mezbûrenin ma‘lûmu olmadığına ve dahi rihân-ı mezbûreyi zevci Siyavuş Ağa kendi izni ile merhûm Dilaver Bey’e rehin vaz‘ eylemediğine tahlîf için kıbel-i şer‘den İbrahim Efendi b. Ahmed irsâl olunup ol dahi mahmiye-i mezbûrede Kadırga Limanı’nda Şehsüvar Ağa mahallesinde sâkine olduğu menzile varıp mezbûre Mümine Hatun’un zâtı Mahmud Bey b. Abdullah ve Emine Hatun bt. Musa ve Sâliha Hatun bt. Ali ta‘rîfleri ile mu‘arrefe oldukdan sonra rihân-ı mezbûreyi zevci müteveffâ-yı mezbûr Siyavuş Ağa kendi izni ve icâzeti ile mütevellî-i mesfûra def‘ ü teslîm etmediğine ve dahi rihân-ı merkūmeyi bir tarîkle mülkünden ihrâc etmediğine huzûr-ı Müslimînde yemîn teklîf eyledikde ol dahi alâ-vefki’l-mesûl halfü billâhi’l-aliyyü’l-azîm etmeğin mûcebince rihân-ı mezbûreyi vekîl-i mezbûr Ahmed Ağa’ya teslîme mütevellî-i merkūm Feridun Çavuş’a tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis min-Muharremi’l-harâm li-sene selâse ve seb‘în ve elf. Şuhûdü’l-hâl: Ali Efendi b. Yusuf, Amasyalı Mehmed Ağa, Mehmed Ağa el-müteferrika, Mehmed b. Musa, Hürrem Bey b. Bayram Efendi, Ali b. Lütfullah, Hasan b. Abdullah, Mehmed Ağa b. Mustafa, Mehmed Ağa b. Mahmud ser-muhzırân, Ramazan Beşe b. Hasan çukadâr, el-Hâc Ahmed b. Mahmud ve gayru[hum].