İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 896 Hüküm no: 1105 Orijinal metin no: [154a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ferhad b. Abdullah’ın vakfettiği menzilin oturma hakkının ulemadan Hüseyin Efendi b. Ali’ye verildiği Dârü’l-hilâfeti’l-aliyye Kostantıniyyeti’l-mahmiye’de Zeyrek Câmi‘i kurbünde vâki‘ bir tarafdan câmi‘-i mezbûr imâmı tasarrufunda olan vakıf menziline ve tarafeyni İsmail Çelebi[‘nin] mutasarrıf olduğu menzillere ve taraf-ı âharı tarîk-i âmma müntehî olan vakıf menzili ashâb-ı hayrâtdan el-Hâc Ferhad b. Abdullah el-harrât nâm sahibü’l-hayrın menzil-i mezbûrun süknâsını evvelâ kendi nefsine ba‘dehû bir recül-i âlim ve sâliha şart ve ta‘yîn etmeğin hâlâ ber-mûceb-i şart-ı vâkıf menzil-i mezkûrun mutasarrıfı olan İsmail menzil-i mezbûrda sâkin olmayıp âhara îcâr etmekle ref‘ olunup ber-mûceb-i fermân-ı âlî menzil-i mezbûr ulemâdan Receb Efendi b. Ramazan’a tevcîh olundukda mezbûr Receb Efendi mârrü’z-zikr menzilden hüsn-i ihtiyârı ile kasr-ı yed etdikde ulemâdan olup süknâya her vechile eşedd-i ihtiyâcı olan işbu râfi‘u’l-kitâb Hüseyin Efendi b. Ali’ye menzil-i mezbûr tevcîh olunup tasarrufu için kıbel-i şer‘-i mergūbdan işbu vesîka ketb olunup mezbûr Hüseyin Efendi yedine def‘ olundu. Hurrire fi’l-yevmi’s-sâbi‘ min-şehri Muharremi’l-harâm li-sene selâse ve seb‘în ve elf. Şuhûdü’l-hâl: Fahrü’l-kuzât es-Seyyid Abdurrahim Çelebi el-kādî bi-Yenipazar muvakkaten, Umdetü’l-müderrisîn Mahmud Efendi, Fahrü’l-müderrisîn Yusuf Efendi b. Yusuf, Fahrü’l-eimme Abdülkadir Efendi el-imâm, Hasan Efendi el-müezzin, Mehmed Efendi kâtib-i masraf, diğer Mehmed Çelebi el-bezzâz, Salih Beşe el-râcil, Mustafa Halîfe be-ocak, Yusuf Beşe er-râcil.