Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 47 Hüküm no: 25 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Kartal kazasında bulunan yeniçerilerin serdarlığına tayin olunduğu Şerî‘at-şi‘âr Kartal kādısı efendi -zîde fazluhum- ba‘de’s-selâm inhâ olunur ki zîr-i hükûmetinizde vâki‘ Dergâh-ı âlî yeniçeri serdârı olan ref‘ olunup yerine üslûb-ı sâbık üzere kıdvetü’l-emâsil ve’l-akrân altmış yedi cemâ‘atin serdengeçdi ağalarından Mehmed Ağa -zîde kadruhû- serdâr ve zâbit nasb ü ta‘yîn olunmağla işbu mektûb tahrîr ve irsâl olunup inşâallâhü te‘âlâ vusûlünde gerekdir ki mûmâ-ileyhi serdârlık umûrunda kıyâm etdirdüp âharı müdâhale etdirmeyesiz ol tarafda vâki‘ Dergâh-ı âlî yeniçerileri ve cebeci ve topçu ve top arabacısı ve kul oğulları ve gılmân-ı acemiyân cümlesi seni üzerlerine serdâr ve zâbit bilüp sözünden taşra ve re’y[in]den hâric vaz‘-ı hareketde bulunmayup itâ‘at ve inkıyâd üzere olalar ve tavâif-i merkūmûndan bilâ-vâris-i ma‘rûf fevt olanların muhallefât ve metrûkâtları serdâr-ı merkūma kabz etdirdüp ma‘rifet-i şer‘le Sûk-ı Sultânî’de fürûht ve hâsıl olan nukūdunu mümzâ ve mahtûm müfredât defterleriyle cânib-i beytülmala irsâl ve îsâl etdiresiz ve sen ki serdâr-ı mûmâ-ileyhsin mukīm ve müsâfirûn zuhûr eden erâzil ve eşkıyâyı zabt u rabtlarına ve sükkân-ı beldenin emn ü rahatlarına bâ‘is-i hıdemât-ı müstahsene-i mebrûre vücûda getirmeye mücidd ü sâ‘î olup mûcib-i mektûbla âmil olasın. Tahrîren evâil-i şehr-i Şa‘bâni’l-mu‘azzam li-sene semân ve seb‘în ve mi’ete ve elf.