Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 46 Hüküm no: 24 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin Pendik’te yasakçı olarak görevlendirildiği Hâlâ Pendik kādısı izzetlü fazîletlü efendi hazretlerinin huzûr-ı izzet-mevfûrlarına dürer-i de‘avât-ı sâfiyât-ı muhabbet-füzûn ve gurer-i teslîmât-ı vâfiyât ithâfından sonra inhâ-i muhibbânemizdir ki Kadîmü’l-eyyâmdan bâ-hatt-ı hümâyûn-ı şevket-makrûn dergâh-ı âlî yeniçerilerinden postal-baha ta‘yîn ve ihsân buyrulan kolluk hâlâ taht-ı hükûmetimizde vâki‘ yasakçı olan ref‘ olunup yerine üslûb-ı sâbık üzere dergâh-ı âlî yeniçerilerinden altmış bir bölüğün Ali Beşe nâm yoldaş işbu bin yüz yetmiş sekiz senesi mâh-ı Şa‘bân-ı şerîfi gurresinden on iki ay tamâmına değin yalnız bir değnek verilüp yasakçı zâbit nasb ü ta‘yîn olunup işbu mektûb tahrîr ve irsâl-i huzûrları kılındı inşâallâhü te‘âlâ vusûlünde eğer gerekdir ki merkūmu yasakçılık umûrunda kıyâm ve istihdâm eyleyüp âharı müdâhale etdirmeyesiz ve tarafınıza mürâca‘at eylediği umûr ve husûslarında bi-hasebi’ş-şer‘ i‘ânet eyleyüp mugāyir-i kānûn bir kimesneye rencîde etdirmeyesiz ve’s-selâm. Fî-gurreti Şa‘bân-ı şerîf sene [1]178 Ani’l-muhlisi’d-dâ‘î Ömer Kethüdâ-i Yeniçeriyân-ı Dergâh-ı âlî