İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 902 Hüküm no: 1115 Orijinal metin no: [155a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşradaki terzilerin mîrî için diktikleri elbiselerde hile yapmamalarına dair ferman. Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn hüccetü’l-hakkı ale’l-halkı ecma‘în vârisü ulûmü’l-enbiyâ ve’l-mürselîn el-muhtassu bi-mezîd-i inâyeti’l-meliki’l-mu‘în Mevlânâ İstanbul Kādısı ( ) -zîdet fezâ’iluhû- tevkī‘-i refî‘-i hümâyûn vâsıl olıcak ma‘lûm ola ki hâliyâ hâssa mîrî hil‘at dikilmek lâzım geldikde taşra terzileri bazı hil‘atleri sakat işleyip koltukların ve bellerin dar dikip hileden hâlî olmadıkların bi’l-fi‘il Âsitâne-i sa‘âdet’de terzibaşı olan kıdvetü’l-emâcid ve’l-a‘yân Mustafa -zîde mecduhû- i‘lâm etmeğin vech-i meşrûh üzere mukaddemâ verilen emr-i şerîf mûcebince ol makūleler mûmâ-ileyh terzibaşı ma‘rifetiyle ele getirilip Dîvân-ı Hümâyûnuma gönderilmek bâbında fermân-ı hümâyûnum sâdır olmuşdur buyurdum ki ( ) vusûl buldukda i‘lâm olunduğu üzere mîrî hil‘atleri sakat işleyip koltukların ve bellerin dar dikip hîle eyleyen ol makūle taşra terzileri vech-i meşrûh üzere mukaddemâ verilen emr-i şerîf mûcebince mûmâ-ileyh terzibaşı ma‘rifetiyle ele getirilip Dîvân-ı Hümâyûnuma ihzâr etdiresin ki şer‘le haklarında lâzım gelen icrâ oluna şöyle bilesiz alâmet-i şerîfe i‘timâd kılasın. Tahrîren fî-evâili şehr-i Zilka‘deti’ş-şerîfe li-sene isneteyn ve seb‘în ve elf. Be-makām-ı Kostantıniyyeti’l-mahrûse