İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 905 Hüküm no: 1120 Orijinal metin no: [156a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Gümrük Mukataası’na bağlı Atpazarı Bacdarlığı’na yabancıların müdahalesine izin verilmemesine dair ferman Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn vârisü ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtassu bi-mezîd-i inayeti’l-meliki’l-mu‘în Mevlânâ İstanbul Kādısı ( ) -zîdet fezâ’iluhû- tevkī‘-i refî‘-i hümâyûn vâsıl olucak ma‘lûm ola ki hâlâ İstanbul ve tevâbi‘i gümrüğü mukāta‘atı emîni olan Mahmud -zîde mecduhû- hâlâ Dersa‘âdet’ime arzuhâl edip şart-ı intizâmıma [iltizâmıma] dâhil Atbâzârı’nda vâki‘ bâc-ı bâzâr mukāta‘asına ecnebiden bazı kimesneler biz miyâncıyız ve berat ile zabtederiz deyü â’id olan rüsûmuma dahleylemeleri ile cânib-i mîrîye gadr ve şart-ı intizâmıma [iltizâmıma] ziyâde kesr ve zarar terettüb eder hayfdır elimde olan berat-ı âlîşân ve şart-ı intizâmım [iltizâmım] mûcebince amel olunup hilâf-ı berat-ı âlîşân âhardan kimesneye dahl ü ta‘arruz etdirmemek bâbında emr-i şerîf verilmek recâ ederim deyü bildirdiği ecilden Hazîne-i âmiremde mahfûz olan İstanbul mukāta‘ası defterlerine nazar olundukda zikrolunan Atbâzârı bâcdârlığı İstanbul’da vâki‘ dalyan-ı mâhî mülhakātından olup sâir mukāta‘alar ile ma‘an birikdirilip gümrük emîni olanların iltizâmında olduğu mastûr ve mukayyed bulunmağın imdi şart-ı iltizâmı ve defter mûcebince amel olunmak emrim olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi mahmiye-i İstanbul’da emîn-i mûmâ-ileyhin şart-ı iltizâmına dâhil Atbâzârı bâcdârlığı elinde olan berat-ı âlîşânım ve şart-ı iltizâmı mûcebince zabt u tasarruf etdirip min-ba‘d mîrîye â’id olan rüsûmuna âhardan kimesneyi dahl ü ta‘arruz etdirmeyesin şöyle bilesin alâmet-i şerîfe i‘timâd kılasın. Tahrîren fi’l-yevmi’t-tâsi‘ min-şehri Zilka‘de li-sene isneteyn ve seb‘în ve elf. Be-makām-ı Kostantıniyyeti’l-mahrûse