İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 904 Hüküm no: 1119 Orijinal metin no: [156a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Girid muhafazasında iken ölen Mustafa Paşa’nın borçlarından dolayı çocukları Abdülbaki, Ali ve Hatice’nin rahatsız edilmemelerine dair ferman Düstûr-ı mükerrem müşîr-i mufahham nizâmü’l-âlem müdebbiru umûri’l-cumhûri bi’l-fikri’s-sâkıb mütemmimü mehâmmü’l-enâmi bi’r-re’yi’s-sâib mü’essisü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sunûf-i avâtıfi’l-meliki’l-a‘lâ Âsitâne-i sa‘âdetimde kāimmakām olan Vezîr İbrahim Paşa -edâmallâhu te‘âlâ iclâlehû- ve akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn vârisü ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtassu bi-mezîd-i inayeti’l-meliki’l-mu‘în Mevlânâ İstanbul Kādısı ( ) -zîdet fezâ’iluhû- ve iftihârü’l-ümerâ’i’l-kirâm müstecmi‘u cemî‘i’l-meâli ve’l-mefâhir el-muhtassu bi-mezîd-i inâyeti’l-meliki’l-mennân başdefterdâr kāimmakāmı olan Süleyman -dâme ulüvvuhû- tevkī‘-i refî‘-i hümâyûn vâsıl olıcak ma‘lûm ola ki bundan akdem Girid muhâfazasında olan müteveffâ Mustafa Paşa’nın evlâdından kıdvetü’l-emâcid ve’l-a‘yân Abdülbaki ve Ali -zîde mecduhümâ- ve kızı Hadîce mahrûse-i Edirne’de Dersa‘âdet’ime arzuhâl edip babaları müteveffâ-yı mûmâ-ileyh hâl-i hayatında sâbıkā Girid serdârı olan Hüseyin Paşa’dan beş bin guruş istikrâz edip lâkin edâ etmedin fevt olmağla kassâm defteri mûcebince taksîm-i guremâ olunup Hüseyin Paşa tarafından ve sâir erbâb-ı düyûn şer‘an hisselerine düşeni alıp kendi bir akçe miras almamışken hâlâ müteveffâ-yı merkūm Hüseyin Paşa’nın zimemi olan meblağ-ı mezbûr kendilerden taleb olunmağla gadr olduğun bildirip inâyet recâ eyledikleri ecilden imdi ellerinde olan fetvâ-yı şerîfe ve hüccet-i şer‘iye mûcebince amel olunup bâkiye-i mezkûr kendilerden taleb olunmaya deyü fermânım olmuşdur. Buyurdum ki hükm-i şerîfim vardıkda bu bâbda sâdır olan emrim üzere amel edip dahi müteveffâ-yı merkūm Mustafa Paşa fevt oldukda muhallefâtı taksîm-i guremâ olup müteveffâ-yı merkūm Hüseyin Paşa ve sâir erbâb-ı düyûnun şer‘an hisselerine düşeni kassâm defteri mûcebince verilip mezbûrlar miras kassâmından almamağla müteveffâ-yı merkūm Mustafa Paşa’nın evlâdını tekrar hüccet-i şer‘iyeye ve fetvâ-yı şerîfe[ye] muhâlif Hüseyin Paşa zimemi olan beş bin guruş talebiyle taraf-ı mîrîden ve âhardan bir ferd dahl ü ta‘arruz etdirmeyesiz şöyle bilesiz alâmet-i şerîfe i‘timâd kılasız. Fi’l-yevmi’s-sâbi‘ ve’l-işrîn min-şehri Rebî‘i’l-evvel li-sene isneteyn ve seb‘în ve elf. Be-makām-ı Edirne el-Mahrûse