İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 101 Hüküm no: 2 Orijinal metin no: [1a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. Sinan’ın halen İsmail Beşe b. Ali’de emaneten bulunan terekesinin vârislerin vekili olan es-Seyyid İbrahim b. Mustafa’ya teslim edilmesi İsbât-ı irse vekâlet Vilâyet-i Anadolu’da medîne-i Aksaray mahallâtından Câmi‘-i Kebîr mahallesi sükkânından olup kendi tarafından asîl ve vâlidesi Cennet bt. İlyas ile li ebeveyn karındaşı Abdülcelil ve kız karındaşı Şerife Fâtıma taraflarından husûs-ı âtîye vekâlet iddi‘â eden es-Seyyid İbrahim b. Mustafa meclis-i şer‘de mahmiye-i İstanbul’da Sultan Selim kurbunda sâkin zahrü’l-müderrisîni’l-kirâm Ali Efendi b. Sinan tarafından zikri âtî da‘vâda husûmet ve redd-i cevâba vekîl olup Mehmed Çelebi b. Hüseyin ve Hasan Çelebi b. Şaban şehâdetleri ile şer‘an vekâleti sâbite olan İsmail Beşe b. Ali mahzarında da‘vâ edip bundan akdem müvekkil-i mûmâ-ileyh Ali Efendi’nin hizmetinde iken fevt olan li ebeveyn karındaşımız es-Seyyid Mehmed’in mezbûre Cennet vâlidesi ve merkūme Şerife Fâtıma ile mezbûr es-Seyyid Abdülcelil ve ben li ebeveyn karındaşları olup verâseti bize münhasıra olmağın cemî‘ terekesi bi hasebi’l-irs bize intikāl eylemişdi hâlâ müvekkil-i mezbûr Ali Efendi’nin bi’l-emâne makbûzu olan terekesini asâleten ve vekâleten bi’l-verâse taleb ederim suâl olunsun dedikde gıbbe’s-suâl vekîl-i mezbûr İsmail Beşe cevâbında müvekkil-i mûmâ-ileyh Ali Efendi müteveffâ-yı mezbûrun terekesini emâneten kabz ettiğini ikrâr, lâkin mezbûr Cennet vâlidesi ve mezbûre Şerife ve mezbûrân es-Seyyid İbrahim ve es-Seyyid Abdülcelil müteveffâ-yı mezbûrun li ebeveyn karındaşları olduğunu ve mezbûrun taraflarından müdde‘î-i mezbûrun vekâletini münkir olıcak müdde‘î-i mezbûrdan müdde‘âsını müsbite beyyine taleb olundukda udûl-i müslimînden medîne-i mezbûre sâkinlerinden es-Seyyid Abdülkādir Çelebi b. es-Seyyid Turhacı ve es-Seyyid Abdülhadi Çelebi b. İbrahim ve Ahmed Çelebi b. Süleyman nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr es-Seyyid Mehmed’in mezbûre Cennet vâlidesi ve mezbûre Şerife Fâtıma ile mezbûrân es-Seyyid İbrahim Çelebi ve es-Seyyid Abdülcelil Çelebi li ebeveyn karındaşlarıdır, babaları mezbûr Mustafa Çelebi b. Abdullah ve vâlideleri Cennet bt. İlyas’dır ve maskat-ı re’sleri zikr olunan Câmi‘-i Kebîr mahallesidir, müteveffâ-yı mezbûrun vârisi [verâseti] mezbûrûna münhasıradır mezbûre Cennet ile merkūme Şerife Fâtıma ve es-Seyyid Abdülcelil ve mezbûr es-Seyyid İbrahim cümlesi müteveffâ-yı mezbûrun terekesinden kendilere isâbet eden hisse-i şer‘iyyelerini vâzı‘u’l-yed olan mezbûr Ali Efendi’den taleb ve da‘vâ ve ahz u kabz ve kendilere îsâle ve kabz ve îsâl mütevakkıf olduğu umûrun cümlesine müdde‘î-i mezbûr es-Seyyid İbrahim’i huzûrumuzda taraflarından vekîl ve nâib-i menâb nasb ve ta‘yîn eylediler. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müvekkil-i mezbûr Ali Efendi’nin makbûzu olan terekeyi müdde‘î-i mezbûr es-Seyyid İbrahim’e teslîme vekîl-i mezbûr İsmail Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene selâse ve seb‘în ve elf. Şuhûdü’l-hâl: Es-Seyyid Mehmed Efendi b. es-Seyyid Ali, es-Seyyid Mehmed Çelebi b. es-Seyyid Ali, Abdülkādir Çelebi, el-Hâc Ahmed b. Mahmud, Abdi b. Hüseyin.