İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 102 Hüküm no: 3 Orijinal metin no: [1a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bozacı Marko v. Tanaş’ın Küçük Karaman’daki bozahâne eşyalarındaki payını Mehmed b. Abdullah’a sattığı Mübâye‘a-i boz[a]hâne Mahmiye-i İstanbul’da bozacı tâifesinden Marko v. Tanaş nâm zimmî meclis-i şer‘-i hatîrde râfi‘ü’l-kitâb Mehmed b. Abdullah muvâcehesinde ikrâr ve takrîr-i kelâm edip Küçük Karaman’da Hüseyin Ağa Boz[a]hânesi demekle ma‘rûf boz[a]hânede vâki‘ âlâtından iki kazan ve altı aded fıçı ve kırk çömçe ve otuz aded kuka ve yirmi aded ağaç sini ve iki darı anbarı ve bir küp ve bir hamur teknesi ve bir el değirmeni ve bir tencere ve bir tava ve yetmiş beş aded kebâb şişi ve sâir beynimizde ma‘lûm âlâtdan dört sehimde bir sehim hisse-i şâyi‘amı işbu merkūm Mehmed’e bi safka-i vâhide beş bin akçeye bey‘ ve teslîm edip mezbûr Mehmed dahi iştirâ ve kabûl ettikden sonra meblağ-ı mezbûr beş bin akçeyi mezbûr Mehmed yedinden alıp kabz eyledim. Fîmâ ba‘d zikr olunan eşyâdan dört hissede bir hisse-i şâyi‘am mezbûr Mehmed Beşe’nin mülk-i müşterâsıdır dedikde gıbbe’t-tasdîki’l-vicâhî mâ hüve’l-vâki‘ gıbbe’t-taleb ketb olundu. Fi’l-yevmi’l-âşir min şehri Ramazâni’l-mübârek li sene selâse ve seb‘în ve elf. Şuhûdü’l-hâl: El-Hâc Hasan b. Ali, Hasan Beşe b. Sinan, Osman b. Şaban, Ali b. el-Hâc Hüseyin, el-Hâc Ahmed b. Mahmud, Şükrullah b. Mustafa, Abdi b. Hüseyin, Baba Resûl b. Rıdvan.