İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 103 Hüküm no: 5 Orijinal metin no: [1a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Büyükçekmece’de sâkine Mariyo bt. Yani’nin ölen çocuklarının Niko v. Yani zimmetinde kalan malları için sulh oldukları Sulh Havâss-ı Aliyye nevâhîsinden Büyükçekmece’de sâkine Mariyo bt. Yani nasrâniyye meclis-i şer‘-i hatîrde Niko v. Yani muvâcehesinde ikrâr ve i‘tirâf edip sagīr oğullarım Yorgaki ve Tanaş ve Markilo’nun? babalarından müntakil mallarından mezbûr Nikola zimmetinde kırk sekiz bin akçe hakları olup sagīrân-ı mezbûrân müte‘âkiben fevt olup verâseti bana münhasıra olmağın mecmû‘-ı meblağ-ı mezbûr bana intikāl ettikde zikr olunan kırk sekiz bin akçeden on altı bin akçesini ahz ve istîfâ edip bâkī otuz iki bin akçe hakkım kalmış idi hâlâ meblağ-ı bâkī otuz iki bin akçeyi da‘vâ ve taleb ettiğimde muslihûn tavassut edip meblağ-ı bâkī da‘vâsında beni mezbûr Niko ile sekiz bin akçe üzerine inşâ-i akd-i sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr sekiz bin akçemi mezbûr Niko yedinden tamâmen alıp kabz edip meblağ-ı bâkī otuz iki bin akçeye müte‘allika âmme-i de‘âvîden merkūm Niko’nun zimmetini ibrâ-i âm ile ibrâ edip fîmâ ba‘d husûs-ı mezbûra müte‘allik vechen mine’l-vücûh ve sebebin mine’l-esbâb mezbûr Niko üzerinde da‘vâ ve nizâ‘ım yoktur dedikde mezbûre Mariyo’nun ikrâr-ı meşrûhunu mukarrun leh mezbûr Niko vicâhen tasdîk etmeğin mâ vaka‘a gıbbe’t-taleb ketb olundu. Fi’l-yevmi’l-âşir min şehri Ramazâni’l-mübâreke li sene selâse ve seb‘în ve elf. Şuhûdü’l-hâl: Şaban Çavuş el-Mübâşir, Ali Beşe Çukadar, Halil Beşe er-Râcil, el-Hâc Mehmed b. Mahmud, Ahmed Çelebi b. Ali ed-Dâ‘î, Abdi Çelebi b. Hüseyin, Abdullah Çelebi b. Mustafa.