İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 104 Hüküm no: 6 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esmak ve Asimo isimli zimmîlerin Bostan Hamamı yakınındaki bakkal dükkanı hisselerinin Kostantin v. Todori’ye satıldığı Mülknâme-i hisse-i dükkân-ı bakkal Vilâyet-i Rumeli’nde Mora sancağında Kritine kazâsına tâbi‘ Velima nâm karye ahâlîsinden olup mukaddemâ hâlik olan Heryo v. İspelyot nâm zimmînin verâseti sulbî kebîr oğlu Esmak ile sulbiye kebîre kızı Asimo’ya münhasıra olup mezbûr Esmak asâleten ve merkūme Asimo tarafından husûs-ı câ’îye vekîl-i müsecceli olan hayyât Polidre v. Yani nâm zimmî meclis-i şer‘de bakkal olan Kostantin v. Todori nâm zimmî muvâcehesinde her biri ikrâr ve takrîr-i kelâm edip hâlik-i mezbûrun terekesinden olup irsen intikāl edip mahmiye-i İstanbul’da Bostan Hamâmı kurbunda vâki‘ bir tarafı hamam-ı merkūma ve bir tarafı Davud Çavuş b. Abdullah mülküne ve bir tarafı Süleyman Subaşı b. Abdullah mülküne ve bir tarafı tarîk-i âma müntehî arsasının Sultan Mehmed Hân vakfına, senede yirmi beş akçe mukāta‘ası olan mülk bakkal dükkânının üç sehimde bir sehim hisse-i şâyi‘asını yüz esedî guruşa merkūm Kostantin zimmîye tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi ber vech-i muharrer iştirâ ve tesellüm eyledikden sonra semeni olan yüz esedî guruşu merkūm Kostantin yedinden alıp kabz eyledik. Min ba‘d hisse-i merkūme mezbûr Kostantin zimmînin mülkü olup keyfe mâ yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek sene 1073. Şuhûdü’l-hâl: Ahmed Çelebi b. Mahmud kethüdâ-yı muhzırân, Du‘âcı Ahmed Çelebi b. Ali el-Muhzır, Osman Çelebi b. Abdullah el-Muhzır, Mehmed b. Ramazan el-Muhzır, Baba Resûl b. Rıdvan el-Muhzır, Yorgi v. Yani, Dimitri v. Petro, Panayot v. Todori, Pavlo v. Petro, Yani v. Todori, Dimitri v. Polidre, İstati v. Yani.