İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 105 Hüküm no: 7 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mariyola bt. Aleksi ile oğlu Nestaş’ın Mahmud Ağa’nın bakkal dükkanındaki eşyalarını Panayot v. Todori’ye sattığı Bakkal dükkânında olan eşyâ bey‘i hücceti Mahmiye-i İstanbul’da Ali Paşa-yı Atîk mahallesinde sâkin olup bundan akdem hâlik olan Bakkal Liyozi v. Yani’nin verâseti zevcesi Mariyola bt. Aleksi ile sagīr oğlu Anastas’a münhasıra olduğu şer‘an zâhir ve sagīr-i mezbûrun tesviye-i umûru için vâlidesi mezbûre Mariyola kıbel-i şer‘den mansûbe vasîsi olduğu şer‘an mütebeyyin oldukdan sonra, mezbûre Mariyola meclis-i şer‘-i hatîrde Panayot v. Todori muvâcehesinde asâleten ve vesâyeten ikrâr ve i‘tirâf edip hâlik-i mezbûrun terekesinden olup sagīr-i mezbûr ile bana intikāl edip Sultan Selim sûkunda Mahmud Ağa’nın bakkal dükkânında vâki‘ bakkal âlâtından on aded fıçı ve iki küp ve nühâs terâzî ve iki takım nühâs derâhim ve iki kantar ve beş aded zenbil ve altı aded tabla ve iki zeytin yağı çömleği mezbûr Panayot’a bi safkatin iki bin sekiz yüz akçeye asâleten ve vesâyeten bey‘ ve teslîm edip meblağ-ı mezbûru tamâmen alıp kabz eyledim. Fîmâ ba‘d eşyâ-i mezbûre Panayot’un mülküdür dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek sene 1073. Şuhûdü’l-hâl: Mehmed Çelebi b. Abdullah, Ahmed Çelebi b. Ali ed-Dâ‘î, Mehmed b. Ali, Şükrullah Bey b. Mustafa, Mehmed b. Rıdvan, Baba Resûl b. Rıdvan, Todori v. Yani, Yani v. Petro, Yorgi v. Yani, Yorgi v. Nikola, Yorgi v. Dimitri, Todori v. Avraham, Kostantin v. Todori, Yorgi v. Todori, Dimitri v. Polindi.