İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 107 Hüküm no: 11 Orijinal metin no: [1b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harun v. İsak’ın vârislerinin arsalarını müştemilatıyla Ağazâde Halil Efendi’ye sattıkları Bey‘-i arsa ma‘a müştemilâtihâ Aragon cemâ‘atinden olup mukaddemâ hâlik olan Harun v. İsak nâm yahudinin verâseti zevce-i metrûkesi Velida bt. Mosi nâm yahudiyeye ve sulbî kebîr oğlu İsak’a ve sulbiye kebîre kızları Sultana ve Hanola ve Meryem’e münhasıra olup mezbûr İsak asâleten ve mezbûrât taraflarından husûs-ı âtîye vekîl olup Aragon cemâ‘atinden Menteş v. Bayram ve Hamon cemâ‘atinden Kiresun v. Menteş nâm yahudiler şehâdetleri ile vekâleti sâbite olmağla vekâleti meclis-i şer‘de umdetü’l-mevâliyyü’l-kirâm zübde-i vülâti’l-enâm sâbıkan Üsküdar kadısı olan Ağazâde Halil Efendi tarafından husûs-ı âtîye vekîl olan Mustafa Efendi b. Halil mahzarında ikrâr ve i‘tirâf edip mûrisimiz hâlik-i mezbûrun terekesinden olup mahmiye-i İstanbul’da Bahçekapısı dâhilinde sâbıkan Hobyar mahallesi ve hâlâ Rumeli kazaskeri olan Kadri Efendi mahallesi denilen mahallede vâki‘ bir tarafı Başeski Beşir? Ağa menzili ve bir tarafı mülk arsaya ve bir tarafı Hüseyin Ağa menziline ve bir ta[rafı] tarîk-i âma müntehî mülk bir kâriz ve bir zîr-i zemîn ve bir su kuyusunu ve bir kenîfi ve sâir mülk ebnâyı müştemil olup arsasının Nişancı Mehmed Paşa vakfına senede iki bin beş yüz akçe mukāta‘ası olan arsanın müştemilât-ı memlûke-i merkūmesi üç yüz esedî guruşa müşârün-ileyh Halil Efendi’ye bâtten bey‘ ve teslîm ol dahi iştirâ ve tesellüm ve arsasını mütevellîsi Esad Efendi izniyle ferâğ ve tefvîz, ol dahi tefevvüz ve kabûl eyledikden sonra semeni olan meblağ-ı mezbûr üç yüz esedî guruşu müşârün-ileyh Halil Efendi yedinden bi’l-asâle ve bi’l-vekâle alıp kabz eyledim min ba‘d ol müştemilât müşârün-ileyhin mülkü ve arsa-i mahdûde-i merkūme hakk-ı tefevvüzü olup mutasarrıf olsun dedikde gıbbe’t-tasdîk mâ vaka‘a bi’t-taleb ketb şüd. Fi’l-yevmi’l-âşir min [şehri] Ramazâni’l-mübârek sene 1073. Şuhûdü’l-hâl: Osman Ağa b. ( ), el-Hâc Yusuf Beşe [b.] Abdullah, Abdi Bey b. ( ), Mustafa Çelebi b. Hüseyin, Ebûbekir Çelebi b. Mehmed, Mehmed Çelebi el-Müezzin ve gayruhüm.