İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 108 Hüküm no: 12 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Selim câmii yakınında bakkal Dimitri v. İstemad’ın eski ortağı Yorgi v. Nikola’ya olan borcunu kabul ettiği İkrâr-ı deyn Bakkal tâifesinden râfi‘ü’l-vesîka Yorgi v. Nikola nâm zimmî meclis-i şer‘-i hatîrde Dimitri v. İstemad nâm zimmî muvâcehesinde takrîr-i da‘vâ edip mezbûr Dimitri ile Sultan Selim câmi‘-i şerîfi’ne karîb bakkal dükkânında bakkallık san‘atında şerîkler olup fesh-i akd-i şirket edip hesâb ve kitâb ettiğimizde, merkūm Dimitri zimmetinde asl-ı mâldan yirmi sekiz bin dört yüz seksen yedi akçe hakkım zuhûr etmişdir, taleb ederim suâl olunsun dedikde gıbbe’s-suâl mezbûr Dimitri cevâbında fi’l-vâki‘ müdde‘î-i merkūm Yorgi ile san‘at-ı mezbûrede şerîkler olup ba‘de’l-fesh ve küllî hesâb zimmetimde müdde‘î-i mezbûra asl-ı mâlından yirmi sekiz bin dört yüz seksen yedi akçe deynim zuhûr eyledi. Meblağ-ı mezbûr müdde‘î-i merkūma zimmetimde edâsı lâzım deyndir dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene selâse ve seb‘în ve elf. Şuhûdü’l-hâl: El-Hâc Ahmed b. Mahmud, Osman b. Abdullah, Şükrullah b. Mustafa, Abdi b. Hüseyin, el-Hâc Ahmed b. Abdullah, Bayram b. Abdullah, Ali Çelebi el-Attâr, Baba Resûl, Andriye v. Yani, Yorgi v. Yani, Atanaş v. Yorgi, Yani v. Yorgo.