İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 114 Hüküm no: 23 Orijinal metin no: [2b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Muslihiddin mahallesindeki menzilin hissedarlar adına Şaban b. Ali tarafından Ramazan Beşe b. Mustafa’ya satıldığı Mülknâme Mahmiye-i İstanbul’da Kâtib Muslihiddin mahallesi sâkinlerinden kendi tarafından asîl ve İbrahim Efendi b. Ramazan tarafından husûs-ı âti’l-beyânı ikrâra vekîl olup Halil Beşe b. Ahmed ve Mustafa b. Abdullah şehâdetleriyle şer‘an vekâleti sâbite olan Şaban b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ramazan Beşe b. Mustafa mahzarında asâleten ve vekâleten ikrâr ve takrîr-i kelâm edip mahalle-i mezbûrede vâki‘ müvekkilim mezbûr ile iştirâk-i seviy üzre mülkümüz olup bir tarafdan ba‘zan Sâime Hâtun ve ba‘zan Fâtıma Hâtun mülkleri ve bir tarafdan Râbia Hâtun mülkü ve bir tarafdan Nalçacı vakfı ve bir tarafdan tarîk-i âm ile mahdûd olup Memişah vakfına arsası senede iki yüz akçe mukāta‘alı birbirine muttasıl iki bâb tahtânî odaları ve iki kenîf ve cüneyne ve sofa ve havluyu müştemil olan menzilimizi cemî‘ tevâbi‘ ve levâhıkıyla mezbûr Ramazan Beşe’ye bi’l-asâle ve’l-vekâle dokuz bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ettikden sonra semeni olan meblağ-ı mezbûr dokuz bin akçeyi mezbûr Ramazan Beşe yedinden tamâmen ahz u kabz edip ba‘de’l-yevm menzil-i mezbûr müşterî-i merkūmun mülküdür dedikde mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek sene 1073. Şuhûdü’l-hâl: Receb Çelebi Çukadar, Mehmed Çelebi b. Yusuf, Mehmed Efendi b. Süleyman, Halil b. Abdullah, el-Hâc İbrahim Efendi, Mustafa b. Ali, Şükrullah b. Mustafa, Abdi b. Hüseyin.