.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 115
Hüküm no: 24
Orijinal metin no: [2b-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sultana bt. Ovanes’in Avraham v. İmirza’da olan alacağını Avraham’ın kefili Kazar v. Agop’tan tahsil edildiği

Kabzü’d-deyn ani’l-kefîl Ermeni tâifesinden olup Sultana bt. Ovanes nâm sagīrenin mansûben vasîsi Sinan v. Minas nâm Ermeni meclis-i şer‘-i hatîr-i lâzımü’t-tevkīrde bâ‘isü’l-vesîka Kazar v. Agop nâm Ermeni muvâcehesinde bi’l-vesâye ikrâr ve i‘tirâf edip sagīre-i merkūma Sultana malından gāib ani’l-meclis Avraham v. İmirza nâm Ermeni zimmetinde karzdan olan iki yüz esedî guruş ile çuka bahâsından otuz esedî guruş ki cem‘an iki yüz otuz guruşa mezbûr Kazar emr ve kabûlü hâvî kefîl olup meblağ-ı mezbûru asîl-i merkūm Avraham Ermeni’den almamağla mezbûr Kazar Ermeni’den alıp kabz eyledim min ba‘d ol akçeden bir akçe ve bir habbe bâkī kalmadı dedikde mukırr-ı mezbûru ikrâr-ı meşrûhunda mezbûr Kazar vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li sene selâse ve seb‘în ve elf.


Şuhûdü’l-hâl: Sefer Beşe b. Abdullah, Mustafa Beşe b. Rıdvan, cerrâh Mehmed Halîfe, çukadar Ali Beşe, Mustafa Çelebi b. İsâ el-Muhzır, Abdi Çelebi b. Hüseyin, Baba Resûl b. Rıdvan.