.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 118
Hüküm no: 29
Orijinal metin no: [3a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Arpaemini mahallesinden Fâtıma bt. Mehmed Efendi’nin Mehmed Beşe b. Sefer’den boşandığı

Hul‘ Mahrûse-i Galata kazâsına tâbi‘ Rumeli Hisârı’nda Arpaemini mahallesinde sâkine Fâtıma bt. Mehmed Efendi nâm hâtun tarafından hul‘-ı âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olup mahalle-i mezbûre sükkânından İbrahim Efendi b. Ramazan ve Mehmed b. Bayram şehâdetleriyle şer‘an vekâleti sâbite olan babası mezbûr Mehmed Efendi, meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-kitâb Mehmed Beşe b. Sefer mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma’nın zevci mezbûr Mehmed Beşe zimmetinde mütekarrir ve ma‘kūdun-aleyh olan sekiz bin akçe mehr-i müecceli ve nafaka-i iddet-i ma‘lûmesi üzerine ve me’ûnet-i süknâsı dahi kendi üzerine olmak üzre ve mukaddemâ mezbûr Mehmed Beşe âhar diyâra gitdikde, üzerine hâkimü’ş-şer‘a farz ve takdîr ettirdiğim nafakadan müctemi‘ olan iki bin akçe da‘vâsından fâriğa olup ve on beş guruş kıymetli bir başlı zenne ferâce verip bedel-i hul‘ olmak üzre merkūm Mehmed Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl ettikden sonra, zevciyyete müte‘allika da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek li sene selâse ve seb‘în ve elf.


Şuhûdü’l-hâl: Mefharü’l-eimme Abdülbâkī Efendi b. İbrahim el-imâm bi câmi‘-i Sultan Selim Han, Abdi Çelebi b. Hüseyin, Gazanfer b. Tevekkül, Hızır b. Abdünnebî, Osman b. Abdullah, İslâm Beşe saka, Mahmud Efendi b. Mehmed el-İmâm, Baba Resûl b. Rıdvan, Yusuf Çelebi b. Abdullah.