|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 117 Hüküm no: 28 Orijinal metin no: [3a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kızıltaş mahallesinden Âbide Hâtun bt. Ali’nin kocası Dilaver Beşe b. Abdullah’dan muhâlaa yoluyla boşandığı
İsbât-ı mazmûn-ı hüccet-i muhâla‘a Mahmiye-i İstanbul’da Kızıltaş mahallesinde sâkine Âbide Hâtun bt. Ali tarafından husûs-ı âtîye vekîl-i müsecceli olan Ahmed Beşe b. Mustafa mahfil-i kazâda, mezbûre Âbide’nin zevc-i sâbıkı işbu râfi‘ü’l-kitâb Dilaver Beşe b. Abdullah mahzarında bi’l-vekâle da‘vâ ve takrîr-i kelâm edip mukaddemâ merkūm Dilaver Beşe müvekkilem mezbûrenin zevci olup târih-i kitâbdan üç sene mukaddem talâk-ı bâyin ile tatlîk etmeğin zimmetinde mütekarrir olan beş bin iki yüz akçe mehr-i müecceli merkūm Dilaver Beşe’den almayıp zimmetinde kalmış idi hâlâ meblağ-ı mezbûru bi’l-vekâle taleb ederim suâl olunsun dedikde gıbbe’s-suâl mezbûr Dilaver Beşe cevâbında fi’l-vâki‘ mezbûre Âbide zevcem olup târih-i kitâbdan üç sene mukaddem huzûr-ı müslimînde zimmetimde mütekarrir olan beş bin iki yüz akçe mehr-i müeccelinden ve nafaka-i iddet ve me’ûnet-i süknâsından fâriğa olmak üzre benimle muhâla‘a-i sahîha ile muhâla‘a edip ben dahi hul‘-ı mezbûru kabûl ve zevciyyete müte‘allika da‘vâdan her birimiz âharın zimmetini ibrâ eyledikden sonra, tarafeynden Mustafa Bey b. Veli nâm kimesneyi bu vech üzre olan hul‘ ve ibrâyı ikrâra vekîl edip ol dahi ba‘de’l-kabûli’l-vekâle bin yetmiş Recebü’l-müreccebinin on altıncı gününde Mahmudpaşa mahkemesinde nâibü’ş-şer‘ olan Mehmed Efendi b. Mahmud huzûrunda, vech-i muharrer üzre olan hul‘ ve ibrâyı bi’l-vekâle ikrâr ve mûcebince yedimize hüccet-i şer‘iyye dahi vermiş idi deyû def‘-i da‘vâ ve mazmûnu min külli’l-vücûh takrîr-i meşrûhunu nâtık ve Mevlânâ-yı mezbûrun imzâ ve hâtemini hâvî ve târih-i mezbûr ile müverrah hüccet-i şer‘iyye ibrâz edip vekîl-i mezbûr muvâcehesinde kırâ’at ve istintâk olundukda vekîl-i mezbûr Ahmed Beşe hüccet-i merkūmeyi inkâr edicek mezbûr Dilaver Beşe’den sıdk-ı makālini mübeyyine beyyine taleb olundukda udûl-i müslimînden el-Hâc Habîb b. Abdi ve Süleyman b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka merkūme Âbide târih-i mezbûrda mezkûr Dilaver Beşe ile mehr-i müeccelden ve nafaka-i iddet ve me’ûnet-i süknâsından fâriğa olmak üzre bizim huzûrumuzda muhâla‘a-i sahîha ile muhâla‘a edip ol dahi hul‘-ı mezbûru kabûl ve herbiri âharın zimmetini ibrâ ve iskāt eyledikden sonra, tarafeynden merkūm Mustafa Bey’i vech-i mezkûr üzre olan hul‘ ve ibrâyı ikrâra vekîl edip ol dahi ba‘de’l-kabûli’l-vekâle Mevlânâ-yı müşârün-ileyhin huzûruna varıp zikr olunan hul‘ [ve] ibrâyı bi’l-vekâle ikrâr etmeğin Mevlânâ-yı mezbûr dahi işbu hücceti bizim huzûr[umuz]da tahrîr eyledi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince vekîl-i mezbûr Ahmed Beşe ta‘arruzdan men‘ olunup mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek sene 1073.
Şuhûdü’l-hâl: Mahmud b. Ali, Receb b. Himmet el-Mübâşir, Abdülbâkī Çelebi b. Derviş, Mehmed b. Ramazan, Mustafa b. Himmet.
|