|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 120 Hüküm no: 31 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe bt. Mehmed’in Abdi Beşe b. Durmuş’tan boşandığı
Hul‘ Mahmiye-i İstanbul’da Şeyh Muhyiddin-i Foçavî mahallesinde sâkine Ayşe bt. Mehmed nâm hâtun tarafından hul‘-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân Aydın Beşe b. Halil ve Hüseyin Beşe b. Mehmed şehâdetleriyle şer‘an vekâleti sâbite olan Hasan Çelebi b. Mustafa meclis-i şer‘-i hatîr-i lâzımü’t-tevkīrde müvekkilem mezbûrenin zevci işbu bâ‘isü’l-kitâb Abdi Beşe b. Durmuş mahzarında bi’l-vekâle ikrâr ve takrîr-i kelâm edip müvekkilem mezbûre Ayşe’nin zevci mezbûr Abdi zimmetinde mütekarrir ve ma‘kūdun-aleyh olan altı bin akçe mehr-i müecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzre, zevci mezbûr Abdi Beşe ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra, zevciyyete müte‘allika âmme-i de‘âvî ve mütâlebât ve eymân ve muhâsamâtdan her biri âharın zimmetini ibrâ-i âm-ı kātı‘ü’n-nizâ‘ ile ibrâ ve iskāt eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek sene 1073.
Şuhûdü’l-hâl: Mustafa Çelebi b. Mehmed, Osman Beşe b. Ali, gümrükçü Osman Beşe, Ahmed es-saka, Mehmed b. Ramazan.
|