|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 120 Hüküm no: 32 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Efendi b. Mehmed’in Serkis v. Yakob isimli Ermeni’ye olan borcunu ödemesi
Da‘vâ Mahmiye-i İstanbul’da Sulu Manastır’da sâkin işbu hâmilü’s-sifr Serkis v. Yakob nâm Ermeni meclis-i şer‘de hâlâ mahmiye-i mezbûrede beledî kassâmı kâtibi olan Ahmed Efendi b. Mehmed mahzarında üzerine da‘vâ edip bundan akdem mahmiye-i mezbûrede Vâlide Hânı’nda misâfiren sâkin iken hâlik olan Pilos v. Cömerd nâm Ermeni’nin terekesi olan iki bin yüz guruşu ben vârisi Zadak nâm Ermeni’nin vekîli olmağla kabz etmiş idim. Mezbûr Ahmed Efendi meblağ-ı mezbûr iki bin yüz guruşun mu‘tâd üzre resm-i kısmeti ve kâtibiyyesi ve ihzâriyyesi deyû on bin akçe aldıkdan sonra, sekiz bin akçemi dahi bî-vech almışdır suâl olunup alıverilmesi matlûbumdur dedikde gıbbe’s-suâl ve’l-inkâr ve akībe’l-istişhâd udûl-i müslimînden olup Havâss-ı Aliyye’de İslâmbey mahallesinde sâkin el-Hâc İbrahim b. Abdullah ve mahmiye-i mezbûrede Altımermer’de Çavuş mescidi kurbunda sâkin Mehmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mezbûr Ahmed Efendi meblağ-ı mezkûr iki bin yüz guruşun vech-i muharrer üzre müdde‘î-i mezbûrun resm-i kısmet deyû on bin akçesini aldıkdan sonra, sekiz bin akçesini dahi bî-vech almışdır biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-tasdîk ve’t-tezkiyye şehâdetleri makbûle olmağın mûcebince meblağ-ı mezkûr sekiz bin akçeyi müdde‘î-i mezbûra red ve teslîme mezbûr Ahmed Efendi’ye tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek sene 1073.
Şuhûdü’l-hâl: Kethüdâ Abdünnebî Ağa, Mehmed Ağa b. Mehmed, Ali Beşe b. Osman Çukadar, el-Hâc Ahmed b. Mahmud, Abdi Çelebi b. Hüseyin.
|