|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 121 Hüküm no: 33 Orijinal metin no: [3b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Neccar İlyas mahallesinde Hüseyin Çelebi’nin mütevellîsi olduğu vakıf dükkanın Halil b. Yusuf’a icâreteyn yoluyla kiralandığı
Tefvîz-i arsa-i dükkân Mahmiye-i İstanbul’da Firûz Ağa mescidi müezzini olup zikri âtî vakıf dükkânın hasbî mütevellîsi olan Hüseyin Çelebi nâm kimesne meclis-i şer‘de bâ‘isü’l-vesîka Halil b. Yusuf mahzarında bi’t-tevliyye takrîr-i kelâm edip mahmiye-i merkūmede Neccar İlyas mahallesinde vâki‘ bir tarafı halfen Sevindik ve Başçavuş veresesi mülkleri ve bir tarafı Ahmed kethüdâ mezarı ve bir tarafı İskender Çelebi vakfı ve bir tarafı tarîk-i âm ile mahdûd olup Kasım Ağa nâm sâhibü’l-hayrın gallesi mescidü’l-mezbûr hareminde olan bi’r-i mâ’nın âb-keşine ve meremmet-i lâzımesine vakf ve şart eylediği dükkân-ı mezbûr bin yetmiş senesi Zilka‘desinde vâki‘ harîkde muhterik olup arsa-i sırfa kaldıkda vakıfda binâya müsâ‘ade olmayıp icâre-i mu‘accele ve müeccele-i misli ile îcâr olunmak cânib-i vakfa nâfi‘ olduğu zâhir olmağın arsa-i merkūme mezbûr Halil’e beş yüz akçe icâre-i mu‘accele ve yevmî iki akçe icâre-i müeccele-i misli ile bi’t-tevliyye îcâr ve teslîm ol dahi ber minvâl-i muharrer istîcâr ve tesellüm eyledikden sonra, mu‘accelesi olan beş yüz akçemi vakıf için alıp kabz eyledim min ba‘d mezbûr Halil arsa-i merkūme üzerine mu‘accelesine mahsûb olmak üzre vakıf için menzil binâ edip emsâli mutasarrıf olduğu gibi tasarruf eylesin dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek sene 1073.
Şuhûdü’l-hâl: Abdülbâkī Efendi el-Kâtib, Abdülkādir Çelebi el-Kâtib, Keşfî Mustafa Efendi el-Kâtib, Şükür Bey b. Mustafa, Abdi Çelebi b. Hüseyin, Mustafa Çelebi b. İsâ.
|