.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 123
Hüküm no: 37
Orijinal metin no: [3b-8]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Galata Voyvodası Pîrî Ağa’nın zimmetine geçen Kanilo v. İstati’nin parasının bir kısmını ödeyerek sulh oldukları

İbrâ Fi’l-asl vilâyet-i Rumeli’nde Mora sancağında Kalavrete kazâsı kurâsından Sodine nâm karyeden olup medîne-i Galata’da Sultan Bayezid mahallesinde sâkin iken hâlik olan Kanilo v. İstati nâm zimmînin verâseti, vâlidesi Kiro bt. Andriye ve li ebeveyn er karındaşı Valisar ile li ebeveyn kız karındaşı Tozura’ya? münhasıra olup kendi nefsinden asâleten [4a] ve merkūmetân taraflarından husûs-ı âtîye vekîl olup Todori v. Yani ve İstadi v. Andron nâm zimmîler şehâdetleriyle vekâleti sâbite olan mezbûr Valisar meclis-i şer‘de sâbıkan Galata voyvodası olan Pîrî Ağa tarafından husûs-ı câ’îye vekîl olan İbrahim Bey b. Mehmed mahzarında ikrâr edip müşârün-ileyh Pîrî Ağa Galata voyvodası iken mûrisimiz mezbûr Kanilo hâlik oldukda, bilâ-vâris hâlik olup terekesi beytülmâle âid olmuşdur deyip yirmi iki bin akçe terekesini kabz eyledikden sonra, ol tereke irsen bana ve müvekkilelerime intikāl eylemişdir, ver deyû müşârün-ileyh Pîrî Ağa’dan da‘vâ eyledikde müşârün-ileyh dahi meblağ-ı mezbûrun yedi bin akçesini kabzını ikrâr ve mâ‘adâyı inkâr eyledikden sonra isbât sadedinde iken vesâtat-ı muslihîn ile meblağ-ı mezbûr yedi bin akçeyi müşârün-ileyh yedinden alıp kabz edip mâ‘adâ da‘vâsında müşârün-ileyh Pîrî Ağa zimmetini asâleten ve vekâleten ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min şehri Ramazâni’l-mübârek sene 1073.


Şuhûdü’l-hâl: Receb b. Abdullah, Osman Efendi, Ahmed Ağa, Süleyman Çelebi, Ahmed Çelebi, Abdi Çelebi.