.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 129
Hüküm no: 46
Orijinal metin no: [4b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan Beşe b. Mehmed’in arsasını Mustafa Beşe b. Murad’a sattığı

Bey‘-i nukz Mahmiye-i İstanbul’da Harâccı Kara Mehmed mahallesi ahâlîsinden olup zikri âtî vakıf menzilin hasbî mütevellîsi Hasan Beşe b. Mehmed meclis-i şer‘de bâ‘isü’l-vesîka Mustafa Beşe b. Murad mahzarında bi’t-tevliyye takrîr-i kelâm edip mahalle-i merkūmede vâki‘ bir tarafı Meryem Hâtun mülkü ve bir tarafı ba‘zan Medîne-i Münevvere vakfı ve ba‘zan müste’cir-i mezbûr Mustafa Beşe mülkü ve bir tarafı Harâccı vakfı ve bir tarafı tarîk-i âm ile mahdûd arsasının senede Durmuş Hoca vakfına üç yüz akçe mukāta‘ası olup binâsı mukaddemâ zevcem iken vefât eden Saraylı Lâleruh Hâtun’un süknâsı evvelâ kendi nefsine, ba‘dehâ bana ve benim evlâdıma vakf ve şart eylediği menzil-i mezbûr [ve] me’ûnet-i süknâ benim iken, bin yetmiş senesinde vâki‘ harîkde muhterik olup bir mikdâr nukzu kalıp vakıfda binâya müsâ‘ade olmadığı zâhir ve ol nukz semen-i misli ile bey‘ ve semeni olan akçe cânib-i vakıfdan irbâh olunmak vakfa nâfi‘ olmağın tevliyyetim hasebiyle mezbûr Mustafa Beşe’ye on beş bin akçeye bey‘ ve teslîm ol dahi ber minvâl-i muharrer iştirâ ve tesellüm eyledikden sonra semen-i mezbûr on beş bin akçeyi yedinden alıp kabz edip min ba‘d arsa-i merkūmede binâ ve nukza müte‘allika alâkam yoktur dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis aşer min şehri Ramazâni’l-mübârek sene 1073.


Şuhûdü’l-hâl: İbrahim Efendi el-İmâm, Yusuf Efendi el-İmâm, Osman Çelebi el-Müezzin, çukadar Ali Beşe, Abdünnebî Ağa kethüdâ, el-Hâc Mustafa b. Yusuf, Mehmed Çelebi b. Mustafa, Ali Beşe b. el-Hâc Mahmud, el-Hâc Osman b. Süleyman, Osman b. Ramazan.