.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 129
Hüküm no: 47
Orijinal metin no: [4b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Panayot v. Polahzoni’nin Lanbortus v. Yani Reis’den alacağını tahsil ederek sulh oldukları

Sulh Gemici tâifesinden Yorgo v. Manol nâm zimmî meclis-i şer‘-i hatîrde râfi‘ü’l-vesîka Kapıdağlı Lanbortus v. Yani Reis tarafından zikri âtî husûsa vekîl olup Manol v. Kosta ve Dimitri v. Nikola şehâdetleriyle şer‘an vekâleti sâbite olan Panayot v. Polahzoni nâm zimmî muvâcehesinde ikrâr ve i‘tirâf edip mukaddemâ mezbûr Lanbortus’un sefînesinde ecîri olup birkaç sene hizmet etmiş idim hâlâ ücretimden bâkī kalan üç bin akçeyi mezbûr Lanbortus’dan da‘vâ edip beynimizde münâza‘ât cereyânından sonra vesâtat-ı muslihîn ile da‘vâ-yı mezbûremden merkūm Lanbortus beni iki bin akçe üzerine inşâ-i akd-i sulh ettikde, ben dahi sulh-ı mezbûru kabûl ve bedel-i sulh olan meblağ-ı mezbûru tamâmen alıp kabz eyleyip husûs-ı mezbûra müte‘allik cemî‘ de‘âvî ve mütâlebâtdan mezbûr Lanbortus’un zimmetini ibrâ-i âm-ı kātı‘ü’n-nizâ‘ ile ibrâ ve iskāt-ı hak eyledim dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek sene 1073.


Şuhûdü’l-hâl: Mahmud Çavuş el-Mübâşir, Oruc Çavuş el-Mübâşir, Mustafa b. Mehmed, el-Hâc Ahmed b. Mahmud, Yorgi v. Dimitri, Panayot v. Akdar, Porihzonu v. Nikola, Papa Kostantin.