|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 133 Hüküm no: 53 Orijinal metin no: [5a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hatice bt. Kasım’ın mülk menzilini Havva bt. Mustafa’ya sattığı
Mülknâme-i menzil Mahmiye-i İstanbul’da Karabaş mahallesinde sâkine Hatîce bt. Kasım nâm hâtun meclis-i şer‘-i hatîr-i lâzımü’t-tevkīrde bâ‘isetü’l-kitâb Havva bt. Mustafa nâm hâtun tarafından ikrâr-ı âti’z-zikri tasdîke vekîl olan Süleyman Beşe b. Hasan mahzarında ikrâr ve i‘tirâf edip mahalle-i merkūmede vâki‘ bir tarafı İmâm vakfı ve bir tarafı Mehmed Ağa bostanı ve bir tarafı tarîk-i hâs ve bir tarafı kapıcıbaşı mülkü ile mahdûd üç bâb tahtânî odayı ve matbah ve kiler ve su kuyusu ve bodrum ve kenîf ve zât-ı eşcâr-ı müsmire ve gayr-ı müsmire bahçeyi müştemil mülk menzilimi, müvekkile-i merkūme Havva Hâtun’a otuz beş bin akçeye bâtten bey‘ ve teslîm ol dahi ber minvâl-i muharrer iştirâ eyledikden sonra, semeni olan otuz beş bin akçeyi müvekkile-i merkūme yedinden alıp kabz eyledim min ba‘d menzil-i mezbûru mülkiyyet üzre tasarruf eylesin dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek sene 1073.
Şuhûdü’l-hâl: Mustafa Efendi b. Yusuf el-İmâm, Hasan b. Mustafa, Süleyman b. Abdullah, müezzin Abdullah Halîfe b. Ramazan, Mahmud Efendi imâm-ı mahalle-i mezbûre, Himmet Efendi el-Müderris, keçeci Ali Dede, Abdi Çelebi b. Hüseyin el-Muhzır, Mehmed b. Ramazan el-Muhzır, Mustafa b. İsâ.
|